【人住公屋我住公屋】走訪西班牙維也納 林二汶感悟:要豐富內心

撰文:朱奕錦
出版:更新:

香港地少,寸金尺土,人多車多,有人說,公屋是「人生勝利組」的入場券,不過一般公屋申請平均輪候時間為5年半,未來很大機會會突破6年,基層市民「上樓」似乎遙不可及。
其實公屋並非香港獨有,究竟海外的公屋有多大?租金多少?居民生活狀況又如何呢?今次ViuTV製作全新節目《人住公屋我住公屋》,邀請曾鈺成、長毛、黃秋生、林一峰、林二汶等,去探訪其他國家的公屋,介紹當地生活,並由周一(12月17日)起,逢星期一至五晚上10:30在99台ViuTV播出。

西、奧徵重稅福利好 5千蚊港幣租金住7百呎公屋

二汶今次同哥哥一峰去了西班牙同奧地利維也納,第一時間見到當地的公屋,二汶直言好羨慕:「嗰度係收好重稅嘅,我唔確實,大概等於你啲人工都差唔多1/3咁上下!」二汶沒有明言「嗰度」是指西班牙還是奧地利,但記者翻查資料,兩國的個人收入稅,分別為19%至45%(西班牙,2018)以及50%至55%(奧地利,2018)。

正因為1政府徵重稅,「所以福利都相對好,,但係你相對住嘅地方當然夠大,因為地方大。第二就係政府畀好多資助,例如一個6、700呎嘅公屋單位,一個月5,000蚊港紙度,咁夠你一家人住,小朋友又有自己房,阿爸阿媽又有自己房。」反觀香港,5800蚊可能也只能住一間80呎的劏房,所以二汶也慨歎:「兩個地方嘅住屋……冇得比!」

香港滿佈高樓大廈,空間窄,城市擠逼,令人倍感壓力。不過國外的城市節奏同氣氛卻有所不同,二汶說:「首先工作時間唔係好長,唔係好多大型商場,唔係好鼓勵你要購物,係一個生活嘅好地方,嗰度一間屋都係山頂嘅大屋咁嘅樣,生活質素好高。」

二汶同一峰小時候也是住公屋,300呎要住6、7人,二汶表示香港申請公屋的條件「好Harsh」,她認為,香港市民在住屋方面沒有得到很大支援。(梁碧玲攝)

政府市民共保古跡 棺材廠改建前衛公屋

二汶今次的旅程為期兩個禮拜,當中最有趣的地方要數維也納的公屋計劃,其中一種是由古跡改建:「因為有一班居民見到個棺材廠Hea咗喺度又執咗笠,於是寫咗個Proposal(計劃書)向政府申請,咁呢一班申請嘅人,就係住呢個Public Housing(公屋)嘅人,佢哋就搵咗設計師同建築師,改建成一個好得意嘅複式單位,係每一個都係複式單位,兩層咁樣,一層係一個倒轉嘅L,另外一層下面係一個正嘅L,咁樣拼埋,就係一個Unit(單位),然之後就一排係咁嘅Unit。因為政府要求要保留部分古跡,所以佢哋就保留咗一個棺材廠嘅煙囪。」

而在西班牙,二汶就探訪由貨櫃改建的公屋,一個搭一個,大概200戶左右,好似小圍城一樣,不過不能入房參觀。另一個特別的公屋,是利用氣候的特性,造成冬暖夏涼的效果,還曾經攞過獎,這就是位於馬德里的「FOA Baboom House」,二汶介紹到:「有一排竹遮住,好似一個Box咁樣,嗰啲竹全部都係每一戶嘅一個窗嚟嘅,咁冬天就打開晒佢,等啲陽光照射入嚟,間屋就暖喇,如果夏天就閂晒,風吹過啲竹就會令啲空氣凍咗,然之後嗰啲空氣就會喺入邊,夠涼,所以入邊係冇冷氣嘅。」

雖然未能入到由棺材廠改建的住屋參觀,不過二汶說大概已經見到個結構,而且每一個都是複式單位,既解決了房屋問題,又保留了古跡,真是一舉兩得。但香港的公屋除了空間小之餘,也很缺乏設計感。(梁碧玲攝)

見識世界後反思:「冇錢買樓唔緊要,搵錢去咗旅行先!」

見到香港同國外居住環境的差距,二汶也相當感觸,於她而言,因為工作多年,積累了一定的經濟基礎,自然可以選擇居住的地方。但在見識到他國的公屋設計,以及生活質素之後,她便由此引發深思:「除咗羨慕人哋嘅Public Housing可以做到咁之餘,究竟我哋嘅生活可以為自己建立啲乜嘢?呢個係我去睇呢個世界嘅時候,我得到嘅改變。」

香港地少人多,好多時候沒有自己的空間,可能最大的「空間」就是好大的Mon,通過這個Mon可以看到很多網上的片,從而豐富自己,得到滿足感,但這遠遠不夠,二汶表示:「雖然會羨慕人哋嘅生活,但我哋都應該反省下,除咗個社會同政府可以做嘅嘢之外,我哋自己可以做啲乜嘢?我就係講你有冇豐富到自己的內心,冇錢買樓唔緊要,搵錢去咗旅行先!」好的改變一定由「心」開始,見識世界就是第一步。

二汶指國外的教育很好,非常鼓勵每個人去發展自己的才能,反觀香港的「填鴨式教育」好似無進步過。當然,世事無完美,國外的市民一定也有各自要面臨的問題,不過,至少最基本的住屋問題不是一個問題!(梁碧玲攝)

未想過移民:我希望見到改變

現在香港越來越多人傾向移民,住屋問題便是原因之一,出道多年,二汶也見識過不少,不過她就未想過移民:「我好鍾意香港,我而家30幾歲,喺度做緊呢啲節目,喺度睇緊呢個世界,攞一啲嘢返嚟,然後我而家講緊嘅嘢,我希望到老嘅時候見到呢啲改變。我始終都係有份感情,我長大嘅呢度佢有好多可愛嘅嘢。」雖然現在大家好似活在一個好噩夢的感覺,好大壓力,但二汶相信這只是一個階段:「如果到我死之前,呢個唔係一個階段,係一個Dead End(死胡同),係一個現實,OK,咁我係喺呢度嚟嘅,我冇得嫌我屋企。」

二汶憶述兒時的生活,鄰里之間的關係非常close,萬家燈火是常態,但是現在大家生活忙碌、壓力大,人與人之間也變得冷漠了。(梁碧玲攝)

鼓勵年輕人旅行增長見聞 改不了制度先改變心態

雖然這個節目未必可以令香港政府改變房屋政策,不過二汶覺得有一件事,是大家可以即時做到的:「我同我阿哥有機會跟住ViuTV去咗睇外國地方唔同嘅公共屋邨,而呢個對我哋嚟講係一個見世界嘅機會,我好鼓勵尤其是90、00後嘅年輕人,你哋去旅行,你哋去睇下。雖然你可以睇書、睇YouTube,喺網上面睇到好多呢啲資訊,但真係不及你望一眼。如果我哋唔可以即時改變呢個社會嘅制度,但係我哋要改變我哋嘅心理,令心理更加豐富。睇完呢啲片,或者睇完呢個訪問,你聽完我講呢個說話,有10個人都好,你哋試下跟住呢一個tour去望一望當地係點樣,然之後explore自己去旅行,呢個我覺得係最即時做到的改變。」

二汶希望節目傳遞的不是「葡萄」的感覺,而是inspire大家如何令到生命更加豐富的感覺。她在維也納介紹一個新的市鎮,那裏有劇院、戲院、運動場、學校等等,二汶說自己當時問了一個問題「會唔會起啲劇場推廣文化?」不過得到的回答是:「其實文化唔係喺一個地方去推廣,文化係由生活開始,因為我哋每一日嘅生活,我哋喺生活中佢搵一啲更加美好嘅嘢,我哋要創作啲嘢出嚟,然後我哋先需要呢個Theatre。」所以二汶覺得重要的是旅行的經驗,而不是局限於睇片。(梁碧玲攝)
+6

Make up: Kris Wong
Hair: Derrrick@the.muse.hair
Wardrobe: wagamamaplayground
場地:九五茶座 放宮樂園