《鐵馬尋橋》10周年將重播 馬國明:當年林子善覺得呢位演員好寸

撰文:陳芷穎
出版:更新:

無綫經典劇集《鐵馬尋橋》2010年首播,來到今年已經十周年,TVB將於2月18日的中午以及深夜時段重播。提起《鐵馬尋橋》,不少網民都大讚好睇,而劇集更令鄭嘉穎、馬國明、唐詩詠、林子善,黃嘉樂成為老友,組成了「鐵馬家族」。他們不時相约食飯,早前新年更一齊到「大佬」鄭嘉穎家拜年,非常熱鬧,感情猶如親兄弟姊妹。

「鐵馬家族」成員勁老友,早前到「大佬」鄭嘉穎家拜年。(IG/ @natalietong53)

「鐵馬家族」成員因拍劇相識十年再變成老友,飾演「二弟」的馬國明深感難得:「最開心呢班朋友由唔識去到好熟,同佢哋好夾,好快好熟又一齊去食嘢。成套劇氣氛好好,大家都好鍾意個劇本,一家人bonding感覺好強,亦都中咗個劇本。我哋係被欺壓嘅一家人,後尾團結渡過好多難關。拍咗好多套劇,唔係每一套劇嘅朋友都可以咁friend,keep住聯絡,我好好彩。」

馬國明最開心係同呢班朋友由唔識去到好熟,大家好夾。(IG/ @natalietong53)

雖然「鐵馬家族」一眾成員friend過打band,不過馬國明就爆原來當年林子善覺得鄭嘉穎好寸:「子善有同我講過未拍呢套劇之前,覺得嘉穎好寸,拍完先對佢改觀。我拍《鐵馬》之前已經同嘉穎好熟,我又未至於覺得佢寸,不過就好cool,唔係好出聲,開頭都驚夾唔到,後來開多兩日工就覺得佢好好玩。佢表面cool,其實佢好易相處。我知好多人覺得佢好寸,外表畀人感覺比較串,識落幾好笑。」

子善當年覺得嘉穎好寸,拍完就對佢改觀。(IG/ @natalietong53)

當年《鐵馬尋橋》的口碑非常好,卻失落了「最佳劇集」,最終由《公主嫁到》奪得。馬國明對此未感可惜,獎項屬其次:「最開心聽到大家話好睇,獎項唔係最緊要,當年可能都有好好睇嘅劇。有冇獎對我哋成班演員嚟講冇咩所謂,最緊要拍嘅過程開心,觀眾鍾意就更加錦上添花。」

點擊睇「鐵馬家族」家庭照:

+4