【疫日搵食】李雨陽餐廳疫巿開一日蝕一日：冇客時候我咪落去扮
2月28日，李雨陽與拍檔開辦、位於觀塘的泰式食店正式結束營業；
同日，記者相約李雨陽於3月2日到他另一間位於深水埗元州商場的分店實地採訪；
3月1日，各大新聞報道：「元州邨一對夫婦確診新冠肺炎」。
場地：
「Cooking Mami」
（長沙灣元州街303號元州商場地下G01號舖）
在「新冠肺炎」肆虐之下，香港人人自危，在盡可能的情況下，都會避免出街飯，安在家中減低被傳染的風險。由於生意淡薄，飲食業面臨倒閉危機，食肆倒閉或停業的數字不斷攀升，「閂得就閂、執得就執」，已成日常。
專訪當日是3月2日星期一，不少公司已開始安排員工回辦公室上班，李雨陽的泰式餐廳「Cooking Mami」於上午11時30分開始營業，記者於12時30分到達餐廳，靜靜觀察了大約一小時，即使是「理論上」最旺的午巿，餐廳內的客人亦「五隻手指數得晒」。
點擊睇吓專訪當日嘅門巿情形：
「有眼睇啦，有目共睹！今日晏晝開舖到而家，10張單都唔夠。」李雨陽約於1點半到埗，期後便衝入舖頭洗手：「飲唔飲嘢呀？整幾杯嘢你哋飲！」
生意得返3成
「疫巿」之下，李雨陽坦言餐廳的生意慘跌60-70%：「其實一路都唔係咁好㗎喇，無論係肺炎出現之前定之後，疫症之後就更加差啦，得返3分1至4分1生意。而家午飯時間應該係最旺嘅，但可以見到得返3枱客，仲要有一枱係自己啲朋友嚟嘅。」元州分店是李雨陽與三位生意夥伴合資，去年11月開業，每人投資了六位數字，但至今仍未做到收支平衡：「而家每個月都仲係跌緊錢出嚟，實質數字就唔講出嚟喇，冇乜意思。（介唔介意透露個生意額？）最差一日幾百蚊都試過，平均都係千零二千蚊一日咁，（每日經營成本呢？）冇得計㗎喇呢啲。」
疫巿求生？
「新冠肺炎」肆虐之下，餐廳「閂得就閂、執得就執」，但李雨陽與拍檔商量過後，仍然堅持蝕住做：「唔開門條數真係最經濟，但又係咪真係要咁樣做呢？街坊、巿民都係要食飯，員工都係要返工，餐廳可以運作嘅話，可以唔停就唔停啦。（派口罩吸客？）派嘅話，始終又牽涉到經濟問題，買貨又係問題，所以口罩我哋會畀員工，亦都有兩支消毒搓手液畀客人用，等佢哋入嚟見到個衛生環境好，食得安心。」門巿生意難撈，李雨陽現正與拍擋密謀商量開發外賣和到會的商機：「既然而家好多人唔出街食飯，我哋可以做到會吖，例如我哋可以幫客人煮幾個餐牌冇嘅泰式餸，畀個預算我，做返個相應嘅食物畀個客。」
堅持V.S. 樂趣
生日做一日蝕一日，但李雨陽仍未言放棄，令他堅持開舖的是客人帶給自己的滿足感：「厭惡性工作嚟㗎，洗碗洗個幾鐘頭，日日清潔搞衛生，但個樂趣就係，客人食完我去收嘢嘅時候見到，咦，食晒喎！咦，汁都撈埋喎！即係好好味啦咁！」但當記者提到「現時樂趣大減」時，李雨陽只能苦笑應對：「所以要珍惜囉！（最壞打算？）最壞打算咪捱到完約囉！不過政府都做緊嘢嘅，雖然話唔知等到幾時，但起碼有個盼頭，政府會幫我哋，會有個動力繼續做落去。」