商台DJ阿檸薛晉寧嘅舊愛梁銘汶（Fiona），喺今年情人節意外去世，雖然二人早已分手，但阿檸始乎一直未放低。呢日佢喺IG貼出二人拍拖時合照，繼續以「老婆」稱呼Fiona，並寫下長文表示會將二人故事出書：「我愛你，好愛。愛到要俾心機愛埋自己⋯⋯」

《香港電影我撐場民選大獎2020》全民一人一票，用行動撐本土！

https://hkmovies2020.hk01.com

旗艦智能手錶 Series 5、Dyson風筒等豐富獎品等你贏！

4月28日凌晨，阿檸喺IG貼出十多年前同Fiona嘅合照：「喂，Obe，十五年啦，咁就。我發現咗個都幾大嘅漏洞，我地兩個一直都冇發現過，原來4月28日，即係今日，係2月14乘2，兩個人嘅情人節，加埋就係我哋嘅紀念日，一諗到咁，就總係覺得我哋係天生一對。我掛住你，如常地掛住你，如常地每秒都會諗起你，未至於做唔到嘢，雖然難啲，不過我應承得你，唔會反口。」

阿檸又透露自己努力履行對Fiona嘅承諾，讓生活重回正軌，努力工作並完成二人之間嘅約定：「我將所有唔捨得掉嘅物件，每一樣都寫一篇文章，記錄低每一件物件嘅故事，寫下寫下，原來都寫咗五十幾篇，不過同你嘅故事都佔咗差唔多一半。其實我寫第一篇嘅時候，已經係關於同你一齊嘅故事，我咪曾經俾過嚟你睇其他嘅？已經係第十幾篇嚟㗎喇。因為我想整合一本書出嚟，等你拎到實體書先睇到，有驚喜，好似會開心啲、窩心啲，可能我遲啲先拎俾你睇啦，放心，我啲嘢通常賣唔晒，一定有得攞俾你，不過攞俾你嘅，永遠都會係第一份，你要求，我記實。」

阿檸留言全文：

喂，Obe十五年啦，咁就。我發現咗個都幾大嘅漏洞，我地兩個一直都冇發現過，原來4月28日，即係今日，係2月14乘2，兩個人嘅情人節，加埋就係我哋嘅紀念日，一諗到咁，就總係覺得我哋係天生一對，我掛住你，如常地掛住你，如常地每秒都會諗起你，未至於做唔到嘢，雖然難啲，不過我應承得你，唔會反口。我每日都盡量productive，喺世界都停止運作嘅狀態下，都仲俾我搵到嘅嘢嚟做，都仲有唔同嘅前輩朋友𥄫住我，俾啲嘢我做，答應得人，就要盡力做好，所以，唔洗擔心。上年開始執嘢，有好多嘢都掉咗，又有好多嘢都唔捨得掉，我將所有唔捨得掉嘅物件，每一樣都寫一篇文章，記錄低每一件物件嘅故事，寫下寫下，原來都寫咗五十幾篇，不過同你嘅故事都佔咗差唔多一半。其實我寫第一篇嘅時候，已經係關於同你一齊嘅故事，我咪曾經俾過嚟你睇其他嘅？已經係第十幾篇嚟㗎喇。因為我想整合一本書出嚟，等你拎到實體書先睇到，有驚喜，好似會開心啲、窩心啲，可能我遲啲先拎俾你睇啦，放心，我啲嘢通常賣唔晒🙂一定有得攞俾你，不過攞俾你嘅，永遠都會係第一份，你要求，我記實。我愛你，好愛。愛到要俾心機愛埋自己⋯⋯好奇怪，明明已經冇咩想做，都冇咩再想分享，一諗起你可能想睇，又攞番起枝筆，明明最憎寫字。地球好大，我想去冒險，去遠少少嘅宇宙，喺之前，就要有多少少生存嘅技能，請睇實我，我每一份作品，都有一個故仔可以講你聽，聽到你覺得煩、覺得攰、覺得眼瞓。可以嘅話，我想夠力，改變沈悶嘅潮流，唔可以嘅話，我拉堆人落嚟我創造嘅星球，上面有我，有我最錫嘅你，有好多愛，當然仲有日常嘅廢話同甜言密語 :)聽日薛晉寧會再開始運作，前進嘅速度要嚇你一跳，你睇住嚟。MUSM薛晉寧