好多KOL網上分享嘅相片都非常專業，但其實好多都只係喺屋企影。Aimee陳茵媺下嫁陳豪先後誕下三個仔女，專心做佢背後嘅女人，將屋企大小事同幾個仔女照顧好。閒時除咗鍾意下廚，呢日上載短片分享高超自拍術，屋企都影到影樓水準﹗

Aimee早幾日貼出一張大頭照，正當大家以為係佢嘅新工作花絮照片，呢日佢上載短片先知原來係自拍照嚟架﹗片段中Aimee企上梯調整打燈角度，再趴喺地上痴好背景紙，然後一人分飾攝影師及模特兒用手機自拍，成品非常專業﹗於多倫多安大略藝術設計學院畢業，做過平面設計及視覺藝術師嘅Aimee都話諗起以前讀書時光，非常過癮。