2020年因為疫情關係，最熱衷旅行嘅香港人被迫一直留港，連帶好多工作都受阻。陳貝兒主持嘅《嫁到這世界邊端》叫好叫座，原訂今年再拍第4輯，可惜因疫情受阻。

陳貝兒出席《big big shop超級感謝祭》記招時表示：「本身已經聯絡晒一批受訪者，我都好期待去啲未去過嘅地方，但疫情影響無得飛都唯有再等。」在旁嘅區永權就建議：「可以諗諗轉陣喺香港拍呀，嫁到長州大嶼山愉景灣咁，都好多老外應該啱你地主題。」

疫情影響下大家都多咗留喺屋企，陳貝兒區永權都話網購買多咗好多嘢，而且亦多咗時間做新嘗試，好似區永權就同蕭正楠組成「一筆區蕭」於網上Jam歌：「每次都會揀啲有意思嘅歌，或者一直想唱之前無機會嘅試下，其實一直都有啲接洽叫我地組合咁上台演唱，公司有出面商演都有，應該好快大家會喺舞台見到一筆區蕭演出。」