《大師兄 Thank You Very Much 感謝祭》今晚（18 日)一集的嘉賓有林盛斌（阿Bob） 帶領的「女神配對計劃隊」，五位女神隊員分別是關嘉敏（Carman）、梁敏巧（Maggie）、葉蒨文（Sophie）、李芷晴（Stephanie）及羅毓儀（Yuki）;還有一姐吳若希帶領的「奇情谷好友隊」,隊員是鄭衍峰、曾展望（GM）、黃子桐（Rachel）、葉靖儀（Michelle）、許俊豪（Lincoln）及孔德賢（Danny）。兩隊的出場方式均相當特別,「女神隊」除了有四大女神玩跌膊大賣搞笑性感，阿 Bob 亦不執輸大玩露腩，加埋阿 Bob 的「懶勁」表情，齋睇相都搞笑。至於出場陣形不及「女神隊」的「奇情谷隊」，則由 Michelle 發表挑機言論搶回焦點：「隔籬女神單身，我哋都係單身架！」完全能感受兩隊有多戰鬥格。

今集氣氛繼續高漲，首先在「開心無敵夾多士」環節中，Sophie 與 GM 這對「愛回家 CP」的互動相當搶焦，首先醒目的 Sophie 上場時，即醒目地曲線宣傳新節目:「有冇咩單身男士?」「奇情谷隊」聞言馬上起哄，並大推 GM 上場，大師兄錢嘉樂亦醒目接招謂：「我幫你揀你（GM）啦！」而當 GM 準備與 Sophie 夾多士時，耳朵竟驚現「紅卜卜」迹象，粉紅氣氛甚濃。

阿Bob 爭櫈仔如有神助　獲女神興奮圍住讚叻叻

另邊廂，阿Bob和Maggie卻爆發火藥味，Maggie 夾多士時，以「鐵頭功」猛撞阿Bob 頭部，力度之大一度令阿Bob「飛出電視畫面」,「痛定思痛」阿Bob 忍不住說：「其實我有啲咩做得唔啱嘅，你咪同我講囉！」可惜去到第二 Round,Maggie 依然未有頭下留情，令見慣風浪的阿Bob焗住投降:「我真係唔玩啦！」雖然阿 Bob 在夾多士環節中失威，但他在「爭櫈仔」環節中卻扳回一成，恍如開了外掛般的他，最終更獲五位女神圍住嗌好嘢。

Sophie 今集效果滿滿，在「開口中」環節中，她被「奇情谷隊」掟到成臉cream,正當 Sophie 想要反擊Lincoln 之際，卻意外跣到成個撻低；鄭衍峰見狀竟辣手摧花繼續向滾地 Sophie 掟 cream,相當無情。