Edan呂爵安一連三場演唱會《EDAN LUI “e to E” LIVE 2025》今晚（16日）在亞博開鑼。MakerVille（MKV）新任CEO金廣誠與MIRROR成員Anson Lo、邱士縉、李駿傑、柳應廷齊齊現身；另外，MKV藝人包埋WinWin、Phoebus 、Lyman 、陳俞希、「爵屎」小儀、大表嫂李炘頤（Alina）都有捧場。

帶上如枯枝面具的Edan，以全黑西裝配上一頭金髮型格登場，一口氣送上《純銀子彈》、《油麻地莎士比亞》及《天天都是愚人節》。Edan今次將講經升級，化身「兒登大師」手持「拂拂」出場講「祓經」，期間除咗話「人會變、月會圓，但點圓都唔夠阿Jer塊面圓」並指著台下嘅Jer。Edan又謂成長會伴隨好多煩惱與麻煩，只要領略「祓經」三大經文：做乜諗嘢、關你諗事、以及來都來了，人生好多煩惱都可以消除。

Edan又自嘲以前出歌閒閒哋都有5百點擊，有啲甚至有2千萬，但最近嘅新歌《我以為可以》，3個月只有30萬點擊，他唯有用「轉念」自我安慰；Edan之後又話近來不時出現喺「難聽歌手俱樂部」YouTube頻道，但幸好Jer、MC亦都係俱樂部會員。Edan之後又話發現妹妹小如豬開工次數比自己更多，IG廣告比自己更多。「佢以前IG全部都係同我合照，而家全部都係同product合照，最重要係佢同product合照笑得開心過我。」

身穿佛袍的羅定英出場，不停「祓」Edan，又爆當年拍攝綜藝時，經常「唔著衫」，其後家英哥又爆私下會叫Edan做「呠呠」，原因是他經常放屁，越爆越多，嚇得Edan提家英哥要唱歌。