無綫（TVB）資訊節目《東張西望》主持吳幸美一向賣力，之前便曾經化身「白老鼠」試飲「斷片酒」，搞到盡失儀態又喊又笑，最後更醉得不省人事，令人印象深刻。今日（29/12），吳幸美現身電視城出席《萬千星輝頒獎典禮2021》的「最佳男女主持」最後五強記者會。對於首度獲入圍角逐獎項，幸美接受《香港01》訪問時表示：「其實我能入到五強，我已經當贏咗，但當然獎項對任何人嚟講，係冇人唔想攞嘅，咁如果有就錦上添花啦！不過無論點都好，有獎定冇獎攞，我都會繼續努力做得更加好，最緊要要係觀眾畀到我信心。（謝辭諗好未？）其實我都做咗18年主持，都有諗過假如有日有獎攞，我會講咩好呢？其實都儲埋咗好多年，咁如果真係有機會，我實會爆喊。因為之前公布10強消息時，我心情都好激動，見到都喊咗出嚟。」