「呢個世界唔係乜都有得解㗎！」《大時代》的丁蟹金句連連深入民心，多年來每次重播均引起話題，就算來到2017年也不感過時，蟹哥的說話永遠都咁應景。最令人驚訝的是，每當蟹哥出現，股市勢必動盪，成為股民的熊市指標。而飾演該角色的鄭少秋（秋官）今次就一於借蟹哥過橋，他即將在5月尾舉行兩場「鄭少秋半世紀大時代世界巡迴演唱會」，近日的宣傳廣告中更寫明「蟹出沒注意」，向來風趣的秋官就話要一反「丁蟹效應」：「我就係想吸引我班蟹民，等他們知道我出現，再告訴大家，今次個市全部都會升，快啲入貨，賺多啲！」

秋官久休再臨，為演唱會做足準備，除了努力keep fit練歌練氣外，前幾日就為演唱會拍攝宣傳海報，度身訂造了兩套有型又出位的西裝，調皮舉動同年齡不相符的秋官全程鬼馬搞笑，造型師大讚他影出來似郭富城，他就笑說自己睇落比城城更後生，只是跳舞就不夠對方好。「大家氹我開心話我似城城，想等我多點精神影多點靚相，最緊要相片效果好睇、靚仔、有型、有現代感。」而說到會否請女兒欣宜做嘉賓，兩父女一起唱大熱歌曲《女神》，秋官就話要同她的唱片公司溝通，做爸爸都要從正常途徑申請，十分搞笑。