TVB出手機App Big Big Channel，全台總動員大曬冷。現場有多對緋聞情侶同場，包括陳展鵬及單文柔、馬國明及黃心穎，仲有麥明詩及余德丞。發布會之前，陳展鵬與單文柔的經理人講到明不會安排兩人一起做訪問，而完場之後，陳展鵬更急急腳走，連訪問都沒做，剩下單文柔一個。

提起緋聞男友陳展鵬，單文柔都有點尷尬，她說：「事先都有傾下偈，傾開都知道今日大家都會同場嘅。」但陳展鵬咁快走，是否有所顧忌？她說：「係咩，我唔知啊，可能佢有嘢做啩。」提到今次同場，下次會否同場兼情侶檔出活動，單文柔說：「冇話唔得嘅，睇下經理人囉。」身旁經理人就話：「睇下幾多錢！」陳展鵬都公開大讚單文柔是好女仔，但她說：「我同佢都仲係了解緊嘅（考慮緊啲咩？）而家都係朋友。」

單文柔講起最近都是做兒童節目主持，對比起其他同屆港姐，可能會輸蝕少少，同屆冠亞季軍都有做主持，但所做的是較為多人注意的《學是學非》，但單文柔說不介意：「我覺得做落又OK啊，至少我是鍾意做綜藝個邊嘅。如果做熟啲，我都想做下一個麥美恩，她在這方面真的好出色，我好欣賞她。」不過拍劇不會好一點嗎？至少多一點曝光率，視帝陳展鵬還可能教她做戲，單文柔說：「如果有都可以試下的，趁現在還新什麼都試下。（向陳展鵬取下經囉！）到時先算啦，都可以向好多前輩學嘢嘅。」