樂宜去年7月與圈中友人合資8位數，開設醫學美容院並擔任代言人，但開業不足半年即爆出金錢糾紛。見過鬼唔怕黑嘅樂宜，今午（25日）現身上環為新鋪造勢，樂宜接受訪時透露由於商場以優惠價吸引藝人開鋪，故投資金額唔算多，約6位數字，而與她合資嘅拍檔，正是去年金錢糾紛嘅另一位苦主。「上年其實係第一次做生意，一直想喺30歲有新搞作，但我覺得呢個教訓都算早，學到嘢同埋都攞得返啲錢。」對於被呃一事，樂宜坦言自己十分蠢，而身邊嘅朋友亦有鬧爆她。

經過去年一疫，樂宜表示都有少少擔心，但今次因為投資金額細，加上又剛好有機會，所以認為應該要再試一次，預計一年內回本。「呢度附近都多OL，同埋我哋會引入更多唔同原素，本身想做豐胸丸，機緣下開埋美容院，自己都係鍾意做美容嘢。你睇我俾人呃都要繼續就知。」

除美容生意外，樂宜亦透露已簽新經理人，接下來有機會幫ViuTV拍攝新綜藝，問到會否想與造星仔仔合作，樂宜表示之前與ERROR合作時，一直無機會與一哥何啟華見面，故今次望有機會與對方交手。