一向備受網友愛戴的「阿叻」陳百祥，雖然上星期做英格蘭足總盃決賽嘅旁述做到網友們罵聲四起，但似乎TVB收到大家對叻哥嘅「愛」，決定將去年由王晶監製，差點淪為「倉底劇」的《賭城群英會》在今個月19號首播。究竟係關阿叻咩事呢？原來叻哥係今次劇集嘅第二男主角呀，王晶加叻哥呢個配搭真係無得頂，到時當然要收睇啦！

日前TVB就開始發力做宣傳播出預告片，如果你是第一次看，一定會誤以為是電影trailer，因為片中竟然是上下出現黑邊，演員嘅對白更配上中英字幕，電視劇預告扮成電影咁，真係第一次見。

預告片一開始，其實連音樂都好似晶哥嘅代表作《賭神》中每逢賭神出現的配樂(有聲..),但就應該係轉咗少少key咁。《賭神》系列必備橋段嘅「聽骰」、「變牌」都係預告片出現。而預告片中所見，馬明飾演嘅OK仔，最後應該會變成失明人士，要女朋友阿佘攙扶出場。

首次拍劇的麥明詩在預告片完全「無影」，她指好開心可以同咁多前輩合作，「有叻哥、馬明同阿佘，論卡士，我排到去果欄啦，無都好正常嘅。」十分謙虛。《賭城群英會》即將播出，宣傳活動一定唔少得，但阿佘同馬明雙雙缺席宣傳，因為前者將飛往馬來西亞拍攝電影，而身在橫店拍《宮心計2·深宮計》的馬明表示，「唔知套劇幾時出街。」一貫天然呆嘅口吻。