無綫新人黃瀅仴（Verena）今日（28/11）現身灣仔出席《WDSF 拉丁團隊舞世界錦標賽-香港2023》記者會。現時就讀港大的Verena透露，現時為無綫兒童節目《Hands Up》擔任主持，直指近日忙過不停，上氣不接下氣：「因為我而家仲讀緊書，變咗呢一兩個月係忙到個靈魂都好疲累，因為好多功課同考試，跟住又要拍嘢，咁所以要好好控制啲時間。」

入行2年的Verena自言擁有一股傻勁，會為自己夢想奮鬥：「其實我喺2021年透過藝員訓練班加入無綫，而我本身係好鍾意演員呢條路，變咗我從來冇認過會放棄，亦唔會為自己定下期限。新人嚟講，我好彩入行到而家，我未遭遇過圈內其他人白眼，但就受盡親戚嘅冷言冷語，就好似喺過年時，佢會當住我面前同我阿媽講：『你個女幾好吖，等佢發多幾年明星夢先啦，到時點都要搵嘢做』，我嗰刻係冇反駁佢。咁始終有緊自己鍾意做嘅嘢，的確佢哋諗嘅嘢都好正常，咁所以我係明白佢哋都係為我好。」