早排有人爆料指無綫在播完《射鵰英雄傳2017》之後，古裝穿越劇《超時空男臣》會接棒播出，即刻上網Check下新劇內容講啲乜，一睇就發現，原來現在維基的資訊都幾「齊全」，劇集都未出街，已經有主題曲、片尾曲的歌名和主唱，而根據維基顯示主題曲是由主角蕭正楠主唱的《超時空男臣》，而片尾曲叫《穿越時空》，由同樣有份參演的吳業坤唱。

睇落好正路，但留意返，近年TVB的劇集歌好多都是由星夢歌手或自家演員演唱，坤哥的經理人約雖然是TVB，但其唱片約就在星娛樂手上，所以咁耐以嚟都同劇集歌無緣，今次有份唱真是一大「突破」。

小記當然要打畀坤哥求證下啦，可惜坤哥就灰爆話：「邊輪到我吖，係就好囉。」坤哥笑言維基有好多假消息，最搞笑的一次是將其新碟名寫做《美麗的吳業坤》……結果都係這些機會不是我的，不過坤哥就話唔會覺得灰：「知要排隊，有就開心，冇就算。」

坤哥大大話話都排了7年隊，到底唱過幾多首劇集歌呢？坤哥坦言：「係0啊。」談到近期TVB出劇唔只片頭、片尾有歌，有時還會有插曲，變相機會大咗，坤哥最近拍緊《誇世代》，有冇機會唱下插曲呢？坤哥直言：「睇下我拍出嚟好唔好先，好就緊係乘機爭取下啦，但應該都係星夢作品啩。」

講到咁仲話自己冇灰，明嘅，近期星夢力捧嘅譚嘉儀一口唱咗幾首劇集歌，新加盟星夢的菊梓喬（Hana）就算冇約喺TVB，劇集歌都一樣源源不絕，坤哥連奪兩屆「叱咤樂壇我最喜愛的男歌手」，就因為份約唔係星夢就連唱插曲的機會都沒有，難道真要的分這麼細？

Come on, James，話唔定過幾日就有電話打嚟叫你去錄音呢。換個角度諗星娛樂咁睇重坤哥，早排仲去咗沖繩拍新歌MV，有得拍劇又有得唱歌，都算叫做人生嬴家啦。