TVB近年有唔少劇集選擇喺內地搭景拍攝，好似陳豪去年底為其主演嘅《企業強人》北上深圳三個月，老婆不時帶埋仔女去探班。 不過如果遇上兩劇在身，就只能即日來回中港，《愛回家》CPU譚坤倫（Alan）日前就拍片示範如何早上10點仍在將軍澳電視城開廠景、中午1點已在惠州為《黑色月光》開工，但就趕到連洗手間同食飯都無時間進行。

喺譚坤倫影片中，見佢早上10點半先入廠拍《愛回家》，11點拍完即時飛車到皇崗，為爭取時間，他先在車內化妝。到咗深圳過關後，再轉車直上惠州，落車補妝、SET頭後即時開工，連廁所都無得去，不過譚坤倫就無咩怨言，仲話內地取景的話，選擇比較多，例如佢今日拍攝嘅5層豪宅，夠晒高貴。戲份唔多嘅譚坤倫，4點收工，佢坐車返到羅湖口岸過關，7點準時返到屋企開飯，全日都在趕時間嘅佢，終於食到第一餐飯。 其實之前戴祖儀都曾在限動分享過一日由澳門、香港、深圳拍攝，佢亦試過喺深圳趕返香港，為嘅就係另一劇集嘅15分鐘散鏡，之後再趕返深圳繼續開工 。