【詭探】邵仲衡再拍第二季：希望唔再飛紙仔
撰文：溫菁莉
出版：更新：
ViuTV劇集《詭探》自上月播出，獲很多正評，今日邵仲衡、蔣祖曼、尹揚明、駱振偉及楊偲詠等人齊集將軍澳出席劇集祝捷會。現場嘅佈置就如劇集一樣，唔開燈都陰陰暗暗咁。有好多觀眾都話《詭探》只得半個鐘，完全唔夠喉，大會有見及此亦踩多自己兩腳，特別製作兩個模板嚟自嘲。
大會特別製作兩個模板嚟自嘲。(溫菁莉攝)
提到劇集只播半小時，邵仲衡都好同意，在台上就話「顧客永遠是對的」。(溫菁莉攝)
《詭探》一眾演員在台上紛紛表示希望可以開第二季，而男主角邵仲衡就話大結局將會有伏線等下一季去探索，咁係咪之後會再見到佢？邵仲衡表示唔會抗拒，因為今次第一季係做得好。至於早前他曾講過劇組要「飛紙仔」，他就話當初有時時提劇組快俾劇本，「因為我都要睇返前文後理，唔想日日打天才波，靠你把口講又或者塞張紙俾我。」邵仲衡指今次演繹角色時無以前咁好似「餓狼式」咁出盡力，「我意思唔係唔擺心機演，我做嘅方法儘量同以前大家見到邵仲衡嘅唔同，我都幾鍾意今次嘅效果，繼續循這個方向發展。」
與唐寧分屬好友的蔣祖曼表示對方心情不錯。(溫菁莉攝)
而昨晚《詭探》中講述女主角蔣祖曼(Joman)飾演的女警方怡被落降頭，其後被一班茅山師傅驅鬼，Joman的演技被網友大讚。她表示拍攝前花了一個月的時間睇「鬼上身」的片段參考，「睇完就開始諗唔會好似恐怖電影般誇張，但係應有嘅範圍內可以做得更好，所以嗰啲片好有功勞。」Joman指如第二季開得成，都好樂意參演。提到好友唐寧離婚一事，她表示近日有同對方見面，「心情OK，已經處理得七七八八。」