拜年耍走親戚絕招（初一）
撰文：01哲學團隊
出版：更新：
拜年總係會畀親戚問三問四，或者大家多年黎訓練有素，已經練出一身應對的好本領，但當中又含有咩哲學意味？例如三大必問問題：幾時結婚，買左樓未，有冇加人工，最基本的耍走親戚答法，就是唔正面迎擊問題，同佢遊花園，又或者講廢話，答案即是另一個問題，未請教、教上教……
親戚：「你幾時結婚？」
我：「派帖時就結婚。」
親戚：「咁又幾時派帖啊？」
我：「結婚時就派帖！」
親戚：「咁你幾時結婚？」
我：「派帖咪結婚囉！」
呢一招，其實人人都識用，而係邏輯的角度，就符合循環論證（circular reasoning）
循環論證，又稱乞題，用來證明論題的論據本身的真實性，要依靠論題來證明的邏輯錯誤。在循環論證中，論證的前提就是論證的結論，因此又稱為「先定結論」。由於論者的依據和主張是一套換湯不換藥的重覆，聽者被繞進死循環只得無言以對。
（故事延伸）
親戚：「咁到底你幾時結婚！」（呢個時候，親戚雖然仲係笑笑口，但笑裡藏刀，心急想你答佢問題！）
我：「買樓嘅時候就結婚！」
親戚：「咁你幾時買樓？」（當親戚以為又放多個高殺傷力炸彈，但其實佢只係中左你圈套咋！）
我：「有錢既時候就買樓。」
親戚：「咁你幾時有錢？」（親戚口快快問已經覺得唔妥當了，因為再問落去就會打開潘多拉的盒子！而呢個時候就係你發功的時候！）
（支線A）我：「中六合彩嘅時候就有錢。」
親戚：「咁你幾時中六合彩？」（如果我答到你⋯⋯End Topic！）
（支線B）我：「儲到錢嘅時候就有錢。。」
親戚：「咁你幾時儲到錢？」
我：「有另一半嘅時候就儲到錢。」（你已經中左我的寫輪眼了）
（支線C）我：「加人工嘅時候就有錢。。」
親戚：「咁你幾時加人工？」
我：「老細加人工嘅時候就加人工。」
親戚：「咁你老細……」（不如我比老細電話你問？）
「你幾時結婚？」大殺傷力在它一年365日都會有人不識時務地問。此招適用於大部分親友，只要不想答，務必虛晃一招「循環論證」。