【日本．和牛入饌】日本 VS 香港最常食的和牛部位係邊PART？

日本人出名食得刁轉，但和牛邊個部位最好食，你又知唔知？如果你係飲食達人，一定知道每一種和牛都有其獨特部位而且各有美味，但對於初學者來說，可能對牛部位唔太清楚，不如先上個入門課程，一窺日本人最常食嘅部位，同香港人有咩唔同，留意平時自己有無miss 咗啲乜？

港人最常食的三種部位

1. 牛柳 （ヒレ / テンダーロイン） － 食黑毛和牛？識食一定食呢part！

香港人對於牛柳一定唔陌生，又有人稱為「牛腰肉」，由於牛活動時較少郁動到牛腰，故此部位的肉質最為細嫩，且脂肪含量較低，口感柔軟。

建議食法：日式燒肉

2. 牛舌頭 （牛タン）－ 以形補形？讓你口齒伶俐！

香港人食燒肉時，最鍾意 order 的部位又點少得牛舌，但又知唔知牛舌原來分為四級？日本國內，牛舌可大致分為四個部位，包括：舌尖 ( 1 )、舌中( 2 )、舌根 ( 3 ) 及舌頭的橫膈膜 ( 4 )，而一般的燒肉店大多提供「舌中」的部分。無論香港定日本的食肆，都會將牛舌切成薄薄一片，你可能會怕牛舌無乜口感，但咬落好鬼彈牙，且腥味不重。

建議食法：微燒即可，可沾檸檬汁進食

3. 牛肩里肌 （肩ロース） － 活動發達，牛都可以係運動高手！

牛的肩胛部因經常活動的原故，筋肉特別發達，肉質結實有彈性，位置約在肩膀到背部中央，因貼近頭部，脂肪的比例較豐富，其油花分布均衡，呈完美的霜降狀，加上肉質與油花配合得恰到好處，入口即化。

建議食法：日式燒肉

日本人最常食的三種部位 － What？連食道、喉嚨氣管都可以食？

各處鄉村各處例，日本人鐘意食嘅部位，港人未必鍾意，但如果喜歡作新嘗試，不妨睇睇日本最得寵的和牛部位係邊 part，下次訪日時，就可以做個地道日本和牛達人。

1. 牛前腰脊 (サーロイン) － 牛的秘密滋味！

牛前腰脊，約莫在肉眼位置，是日本人眼中是和牛最頂級的部位；其油花分布呈細緻網狀，肉質較為甘香可口，脂肪的甜味會逐漸在嘴中蔓延開來。
建議食法：煎牛排、壽喜燒、打邊爐

2. 橫膈膜 （ハラミ）－ 獨特口感，細膩滑嫩！

外觀與一般內臟無疑，同樣呈現鮮紅色，唯一的分別在於，牛橫膈膜肉並無內臟的血腥味。由於牛橫膈膜肉在香港市面不普及，而在日本相比其他牛的部位，亦屬稀少。 牛橫膈膜肉的位置在牛腹附近，一般會切得比較薄身，其口感略帶清爽，且鮮味十足。
建議食法：日式燒肉，搭配沾醬

3. 內臟 （ホルモン） － 識食點會唔食內臟！

好多香港人都好怕食內臟，好似牛小腸、牛大腸、牛胃等，一定耍手擰頭。不過在日本飲食文化中，甚至有專食燒內臟的食肆，自問食得招積嘅香港人，到訪日本點可以唔試？

建議食法：燒烤至微焦後，沾上少量醬汁即可

牛食道（ノドスジ・ショクドウ）－　什麼？食道都可以食？

日本國內極為稀有的牛部位，想食都唔一定食到，建議可以詢問一下店家有無得賣。其特點是比其他牛的內臟偏瘦，脂肪較少，不會太過油膩。 

牛喉嚨氣管內的軟骨 （ウルテ）－ 牛內臟最堅硬的部位！

顧名思義是牛喉嚨氣管內的軟骨位置，屬於牛內臟中最堅硬的部位。如果要食軟骨，連鎖或大型和牛店很少見，一定要去日本當地小店才有提供，咀嚼時可以感受到其肉質略帶粗糙，味道較淡。

《香港01》App， 每秒更新的旅遊天書 ！
立即下載： https://hk01.onelink.me/FraY/hk01app