每年年尾就係樂壇頒獎禮嘅高峰潮，首戰由「十大中文金曲」喺上禮拜（17/12）揭開序幕，可能因為冇咗電視搞直播，所以頒完獎感覺上都冇咩聲氣咁。四大頒獎禮唯一就得「勁歌」可以喺電視度日播夜播做宣傳，今次大台就好Hard sell咁要人下載佢個Bigbigchannel APP投票，入面有「候選歌曲」同「候選新人」畀大家公投，大台不嬲都玩圍威喂，所以喺70首候選歌曲入面幾乎有40首都係星夢或者係英皇嘅歌手，而40首入面又有十幾首都係大台劇集嘅主題曲/插曲/片尾曲，保守估計10首金曲獎入面，最少會有5首都係劇集歌。

雖然前排傳聞話因為天后容祖兒唔玩，大台就縮皮將男歌手獎同女歌手獎撈埋做「最受歡迎歌星獎」，真係史無前例，但睇埋新人獎候選名單大家可能會仲詫異。大家成日都話樂壇青黃不接，冇好嘅後浪，搞到前浪容祖兒喺冇競爭對手情況之下連拎12次女歌手獎。

睇返今年勁歌有13位歌手連組合喺新人獎候選名單，分別係：劉敬雯、組合MFM、陳蔚琦、丁可欣、王嘉儀、伍富橋、余香凝、谷微、林若盈、徐加晴、 陳蕾、黃意雅、顏卓靈。相信大家睇完呢堆名都搞唔清佢哋係邊位，最有印象嘅就應該係由演員身份加盟樂壇的顏卓靈，好多港產片入面都會見到佢嘅面孔，今年啱啱就出咗隻新碟叫《閃光》。

不過最紅都未必係顏卓靈，因為仲有個知名KOL改咗個新名做歌手，嗰個就係丁可欣火雞姐，佢喺YouTube入面條條片都幾十萬view，未聽過丁可欣都起碼睇過佢嘅片，真係估唔到火雞姐都轉行唱歌。但多人識都未必有機會拎獎，因為大台都講明興益自己友，其中入面陳蔚琦、伍富橋、谷微都係星夢，大家明啦，前排見大台日日都狂Loop伍富橋首《我怎會如此》，睇嚟新人金獎都係佢囊中之物。

值得一提嘅係今年候選新人其實一啲都唔新，好似澳門組合MFM咁，入面嘅歌手羅嘉豪、AJ同祖絲早喺兩年前已經出過碟，年頭明明見佢哋叫SP3子，突然又變咗做MFM競逐新人。另外，陳蕾09年玩《亞洲星光大道》簽咗亞視之後雖然就冇出過碟，但Keep住年年都有歌出，等到上年亞視執咗，今年終於可以轉台去TVB玩。

唔知大家最有印象係邊個歌手呢：（點撃下圖）