邊個話二次創作一定係戲謔？ 「老虎歌皇」貼地唱出港人心聲
撰文：彭嘉彬
出版：更新：
早幾年香港潮流「二次創作」四字，不過時日如飛，到底又有幾多人仍然堅持二次創作，以創作述說心聲？最近網上出現一位戴著老虎面具的歌手，把不同大熱歌曲二創出另一面貌，歌詞改頭換面，恍如新生。可能你會覺得好熟面口，點解呢條橋玩極都唔厭？由龍小菌開始，再到許靖韻都要蒙面扮小背心，唔通遮面呢條橋真係百用不厭？其實呢位「老虎歌皇」嘅賣點並唔喺外貌上，而係佢改編嘅歌詞，實在講出唔少港人心聲。
同樣係遮面示人，不過識得欣賞嘅，就知道呢位「老虎歌皇」唔止係一位「蒙面歌手」咁簡單。 (網絡圖片)
「老虎歌皇」由大約一個月開始於網上出現，第一首歌曲《裝飾的拉花》改編了謝霆鋒的《非走不可》，最初也是以戲謔方式恥笑一下Chef Le Mon的「拉花事件」，當時已有不少網民表示「老虎歌皇」的歌聲跟陳奕迅有點相像，的確，如果你以為「二次創作」就等於唱得差，咁就大錯特錯了。其實「老虎歌皇」再推出改編自《取消資格》的《九千七百》，道出打工仔的殘酷現實，「最怕其實是搵少幾百 連劏房也要六千八」，總算是苦中作樂。就是由這首歌開始，「老虎歌皇」找到他的歌路，用二次創作改編歌曲，帶出港人心聲。
唔需要太多花巧嘢，一個面具、一支結他、一支咪，組成咗充滿個人風格嘅「老虎歌皇」。 (影片擷圖)
由「六百幾一張Disney飛」的《加價失調》；「實情內部預售不對 幾秒冇哂我已O咀」的《可惜我買唔到飛》；再到「帶上釘帶實痛 你再蠢都會懂」的《條頸最痛》。「老虎歌皇」近日又推出新作，以剛剛在叱咤頒獎禮上得到「我最喜愛的歌曲」的《長廂廝守》改編成《車廂廝守》，未聽歌都知題材係乜，「何日這港鐵可以改善 唔壞咁多次」，淨係呢句歌詞，都足夠令打工仔每朝返工搭地鐵嘅時候循環播放啦！