周慧敏紅館騷點止露背騷長腿 我最期待嘅美少女戰士出現啦!

撰文:黃浩晉
出版:更新:

「玉女掌門人」周慧敏(Vivian)昨晚舉行紅館騷頭場,無論舞台效果、燈光,以及至服裝都極盡心思,為樂迷送上驚喜。眾所周知Vivian保養得宜,簡直「唔識老」,演唱會所穿宮廷裝、天使裝、美少女戰士裝一樣carry到,體態fit到令不少女士「葡萄」。是次演唱會為紀念Vivian入行30周年,當然唱盡經典作品,讓大家回到那些年,更邀得「元祖美少女」王馨平及湯寶如上台,全場大合唱「你你你!快跪下!」青春回憶返晒嚟。

由《流行經典50年》等到而家,終於等到呢三位「元祖美少女戰士」嘅出現! (梁碧玲攝)
+8

Vivian昨晚的歌單完全照顧不同年代的樂迷,有《最愛》、《痴心換情深》、《感情的分禮》、《可知我想他》、《會錯意》、《咖啡在等一個人》等等一應俱全。而舞台效果同樣有心思,一開場有「天使下凡」,到中段有「天鵝湖」主題。身穿黑色Deep V晚裝的Vivian以鋼琴自彈自唱《時間》,然後坐在近三、四米高的天鵝裝置上唱出《可知我想他》,配合熒幕播出的月圓動畫,令觀眾置身另一時空一樣。

Vivian有不少經典合唱歌如:《流言》、《萬千寵愛在一身》、《情未了》、《真愛在明天》等等,所以昨晚邀請到黃凱芹上台重現經典,二人手牽手唱盡以上情歌;歌唱時甜絲絲,到傾偈環節就互窒放笑彈。

專家Dickson都睇到直豎拇指。 (梁碧玲攝)
+2

Vivian與黃凱芹是30多年的老朋友,當年「男追女」的緋聞傳得熱烘烘,二人重提往事像開迷你棟篤笑。由在港台相識的經過,到一齊登台出騷,講到「見家長」,無所不談。Vivian在台上爆料:「點解我哋識咗30年有多,但係我冇你電話號碼嘅?你有冇手機㗎?係咪智能電話嚟㗎,有冇Whatsapp㗎?」一聽到呢句全場大笑。豈料黃凱芹神回應:「我Whatsapp淨係加我屋企人,你又唔做我屋企人。」台下聽到「嘩嘩聲」,台上Vivian一臉沒好氣的樣子。

用二人緋聞開題講笑觀眾就最受落,黃凱芹繼續爆seed,講到認識對方家長,又指Vivian母親讚過自己靚仔又好仔,不過佢話:「你阿媽對我幾好都係廢嘅!」又以韓劇男女主角比喻他與Vivian的關係:「我哋就好似韓劇裏面嘅主角咁,永遠修唔成正果!」雖然二人老友鬼鬼,但再講落去難免都會尷尬;Vivian立即轉Channel讚對方是自己的榜樣。

Vivian話:「你真係我嘅Role Model嚟,你做唱歌比我先,做DJ比我先,離開電台都比我先……」話音未落黃凱芹又神回一句:「離開呢個世界都比你先!」Vivian講笑話:「我幫你化妝。」雖然話題有點「大吉利是」,但引得觀眾拱堂大笑,大家都明白是節目效果而已。

黃凱芹同周慧敏話當年放笑彈。

除了黃凱芹的「迷你棟篤笑」,另一個焦點當然是「元祖美少女」再現。Vivian身穿紅色珠片騷長腿、王馨平穿藍色戰衣晒馬甲線、湯寶如則穿黃色戰衣晒事業線。三人一登場扭轉全晚的氣氛,本來觀眾都很斯文保守,一聽到《美少女戰士》主題曲便立即企起身跟住拍子跳,真係估你唔到。雖然三人已是「美魔女戰士」,仍然有魄力在台上又唱又跳的精神實在令人佩服。Vivian話:「希望呢套動畫可以做落去,等我哋唱到60歲!」王馨平更話:「只要你哋夠膽聽,我哋就夠膽唱!」

希望呢三位「元祖美少女戰士」真係唱到60歲都繼續啦! (梁碧玲攝)

正所謂「開心時光過得特別快」,聽完《美少女戰士》就去到最尾兩首歌,分別是《孤單的心痛》和主題曲《天荒愛未老》,台上播出Vivian與各位圈中好友的合照,有王菲、張學友、黎明、黃霑、張國榮等等,難怪Vivian都唱到感觸眼濕濕,到演藝圈能認識一班好友伯樂實在不容易。最後Vivian隨住「求天荒愛未老」的唱聲慢慢回到後台,整個演唱會圓滿結束。

周慧敏真係keep得好好,無論Deep V定大露背一樣Carry到! (梁碧玲攝)
+1