男子組合Shine相隔5年再踏紅館舞台，昨晚舉行尾場，實在帶fans「回春」，不單唱出盛載8、90後青春回憶的作品，更邀得at17及Twins擔任嘉賓，陣容如此鼎盛，只能講句「邊夠你玩啫！」攝影：江智騫

Shine紅館騷來到尾場，天佑與又南施展渾身解數表演，天佑化身白馬王子solo之後，到又南化身Rock友拿起結他翻唱黃貫中的《無得比》及Linkin Park的《What I ‘ve Done》，連同樂手們走到台中央一同表演，再次證明識樂器的男人特別有魅力，佑南謙虛話：「我知道我冇原唱者唱得咁好，但我真係好想分享我鍾意嘅音樂，希望大家支持我！」

接着到二人騷肌環節，天佑與又南都脫去上衣，展示苦練多時的成果。天佑扮森小龍耍雙截棍，又南跳鋼管舞展示力量的一面，全場女fans為之瘋狂，又尖叫又「揼」地，令紅館出現第二波地震。

超多肌肉相，即按大圖慢慢嘆！

全場熱血沸騰過後，首隊嘉賓at17登場，與Shine合唱《曼谷碼利亞》，其後台上放出四人同期出道初參與頒獎禮的照片，盧凱彤話：「你哋個樣冇變，係變身材囉！」隨即四人開始妙問妙答。二汶：「點解上次我哋開騷，你哋冇嚟做嘉賓呢？」Shine：「因為當時冇咁熟。」二汶：「咁點解今次你哋開騷，我哋又會嚟做嘉賓呢？」Shine：「因為依家熟咗啲囉！哈哈！」觀眾都跟著哄堂大笑。妙語連珠過後，Shine交個台俾at17唱出《The Best Is Yet To Come》，簡單一支木結他，加上Ellen與二汶的歌聲令大家浸沒清新抒情的氛圍之中。

Shine再次登場化身「金銀潤」，唱出《熊貓》、《舊生會旅行》、《兩個龍捲風》，兼通場跑與觀眾握手，fans都走到台前等待近距離見偶像。

演唱會驚喜一浪接一浪，到另一個8、90後回憶組合Twins壓軸出場，與Shine合唱《明愛暗戀補習社》，真係回憶滿瀉，令人回到「做女嗰個年代」。然後四人大談初相識經過，豈料阿Sa大爆：「天佑真係同我初戀男友好似樣！」令全場fans嘩然。天佑就憶述當時阿Sa變得非常健談：「當時講宵拍完戲，一齊坐保姆車嗰陣，阿Sa係咁同我傾偈，嗰下我覺得『咦，原來佢咁健談』！」一輪歡笑聲過後，Twins返回後台，Shine更應承下次Twins開騷會擔任嘉賓，有來有往。

《天又藍》、《十八相送》、《俗》及《燕尾蝶》《鼎鼎大名》等大熱作品留到最後一節唱出，出「絕招」冧fans，豈料今次有「真Encore」。正當fans聽完《鼎鼎大名》準備離場之際，天佑與又南再次上台唱出《勁愛你》，殺fans一個措不及，最後演唱會於晚上11時半結束。

Shine完騷接受訪問時，被問到天佑似阿Sa初戀男友一事，佢哋都係今日先知，阿Sa亦有俾相佢哋睇，不過天佑睇完覺得唔太似樣：「其實唔係話好似嘅，阿Sa話後生嗰陣似啲喎！仲有阿嬌話好少見到阿Sa咁多嘢講，原來係因為阿Sa覺得我似佢初戀男友先咁多嘢講，覺得好有親切感！」另外問到，既然二人都有「Show後失落症」，那會否在不久將來開較小型的演唱會「止癢」？又南話：「其實有諗過開Tour嘅，原定一切都仲傾緊；而且依家都想keep住做新歌，等人哋留意到Shine其實一直都活躍嘅，想儲多啲歌先！」