又嚟到一年一度五迷們最重要嘅日子，為了五月天與香港樂迷每年的「五月之約」，五迷紛紛都要提前展開一場激烈的廝殺，而戰場當然就是優先訂票網站。今朝8點半唔少五迷已經買定幾個Keyboard同Mouse等開閘，難得五月天今次一反傳統唔開紅館，選擇在迪士尼的露天場地演出，深信不少五迷已經下決心，點都要爭返張飛。可惜的是，比起往年五月天的演唱會門票，今年似乎更難入手，F5大法也未必有用。

由早上9點直至現時，不少五迷已在網上連環炮轟，表示優先訂票網站完全無法進入，即使多番嘗試，也只是不斷循環出現「無法連上這個網站, 回應時間過長」、「500-Internal server error」、「Sorry, Server Busy! You can not enter our online booking system at the moment. Please try again later! 」等字句。若果今早上班看見隔離位同事電腦出現以上字句，唔需要擔心，絕對唔係公司wifi死咗，只係你好同事買唔到五月天演唱會飛啫，呢個時候你可以為佢遞上暖水，安撫一下佢不安嘅情緒，增進同事之間嘅感情。

可能你會話，上網買唔到都預咗，聰明人大多都會打電話購票。Sorry，電話一樣無從入手，有網民今早已炮轟，打足兩小時一樣唔通，更甚是當你發現電話接通後，卻瞬間被cut線，心中的怒火可說是不言而喻。

五迷不停喺網上破口大罵，唔知你哋又有冇遇上佢哋嘅慘況？