初嚐踏上紅館舞台滋味嘅鄭欣宜（Joyce）今晚舉行演唱會《Break A Leg 鄭欣宜演唱會》尾場，爸爸鄭少秋、好友周秀娜、彭秀慧、連詩雅、謝婷婷、汪明荃、Aga、Gin Lee、王宗堯、毛舜均、胡楓、姜大衛、莊思敏、黃偉文等都有到場支持。

首次喺紅館開騷，一開場Joyce化身女王，著住黑色bling bling衫襯長boot現身，仲同8個著粉紅色緊身衫嘅dancers排開升上台，霸氣十足！

雖然Joyce早前發生意外而導致左腳受傷，不過依然勁歌熱舞亮相，更做出高難度拗腰動作，仲同男dancers埋身跳舞，睇到現場觀眾血脈沸騰！值得留意嘅，係Joyce挑選咗11首經典歌，集合埋造串燒歌，向90年代天王天后致敬，歌曲包括有：鄭秀文嘅《叮噹》、《煞科》，梅艷芳嘅《妖女》，張國榮嘅《大熱》，陳慧琳嘅《花花宇宙》，張學友嘅《頭髮亂了》，容祖兒嘅《越唱越強》、《隆重登場》等。之後當然唔少得Joyce嘅招牌動作1字馬，不過就因為腳傷而改咗由右腳變咗左腳。

勁過熱舞過後，Joyce就以歌聲為大家cool down。換咗黑色魚尾裙嘅Joyce就企喺高台，由鋼琴伴奏下，唱出《你是什麼時候開始不愛我的？》、《無表面傷痕》。配合舞台後面螢幕黑白嘅視覺效果，同埋live band，當Joyce唱出《Final Calling》嘅時候，適當嘅飆高音充分表演出佢嘅唱功，單靠歌聲已能夠撐起場面。