不少人認為，廣東樂壇就有如圍城一樣，城外的人想進去，城裡的人又想出來。對很多歌手來說，廣東歌慢慢變成了一塊踏板，繼而進軍更大的市場。不過亦有一些外地的歌手，對廣東歌有著情意結，即使不是自己的母語，仍然希望能推出廣東作品。就如Gin Lee般，雖然是馬來西亞人，但亦在香港落地生根。同樣來自馬來西亞的，近期還有一位男歌手叫TR陳浩廷，也對廣東歌有著謎樣的興趣，本來在泰國樂壇發展了四年，經已有一定的樂迷基礎，突然推出廣東歌，TR表示：「我鐘意廣東歌詞嘅深度，好有意思！」

提起自己的廣東作品《琉璃星空》，TR亦特意找來香港的詞曲人合作，他解釋：「最初見到份歌詞，可能都會唔明白當中歌詞嘅意思，要不停問填詞人先充份了解到。因為馬拉人寫歌詞，大部份都會係表白式嘅內容，一睇就會明白講緊戀愛、分手。不過睇香港人寫歌詞，要估下當中嘅比喻，花多啲時間去了解整首歌嘅內容，呢種係廣東歌詞嘅特點。」

對廣東話及廣東歌的情意結，TR笑言其實也是由TVB而起：「以前睇《溏心風暴》、《衝上雲霄》，故事好緊湊，所以我哋好多馬來西亞人都好鐘意睇港劇。另外我爸爸又會喺屋企播張學友、譚校長、Beyond，所以細細個已經認識廣東歌。」在眾多的香港歌手當中，TR特別喜歡衛蘭：「我之前參加過一個廣東歌比賽《咪王爭霸》，比賽裡面一定要唱廣東歌，於是我揀咗好耐，到底有咩廣東歌適合自己比賽？然後就發現衛蘭嘅歌曲好接近自己嘅R&B風格，亦用咗佢首《大哥》去參加比賽。」

早年於泰國出道做歌手，這條路對TR來說亦是相當特別的經歷：「因為我媽媽係泰國人，中學時期有一日佢帶我返泰國電影片場，個監制見到我就覺得我好特別，因為我個樣唔似泰國人，比較偏白但又識講泰文。後來佢聽到我同媽媽講廣東話，就覺得好特別，於是就開始喺泰國拍戲。」由於喜歡在片場唱歌，又為TR帶來另一機遇：「因為我會喺片場唱華語歌，監制又覺得好有趣，將我介紹咗畀泰國嘅唱片公司認識，最後簽約成為咗歌手，主力唱泰文歌。」

一唱便是三、四年，有一日TR的爸爸又跟他說：「其實你係一個華人，又識創作，又識普通話廣東話，點解唔返華語市場試下？於是我就返去馬來西亞重新再出發，好似一杯滿咗嘅水，倒空咗再嚟過。」