伍富橋今日（8日）在IG推出新歌《你是我的薔薇》MV，今次MV遠赴英國、芬蘭拍攝，伍富橋最感謝太太肯擔任MV女主角，更表示MV情節有點悲情，太太才答允演出，他說：「其實好難叫得郁我老婆去演出做女主角，點解今次得呢，因為今次唔算係正式自己歌啦，係cover歌，團隊就係我同大家朋友拍啲片再剪埋一齊，因為咁所以佢唔介意出鏡，同埋因為個故事唔係甜到漏嗰隻，有啲悲傷咁佢就接受到，佢話太過sweet 自己唔會想做，佢話自己喺MV入會死就啱喇，佢就會出現喇。」

而伍太透露今次係慳家拍攝：「冇用好多錢，機票都係Asia miles換嘅，跟住啲內陸機好平，講緊係千幾蚊一個人，所以無乜駛錢，拍攝地點都係搭接駁巴士去。」
MV 由伍生、伍太及找同行朋友拍攝，所以製作成本相當經濟，反而最大挑戰是天氣，伍太說：「芬蘭嗰陣得負廿幾、三十度，朋友幫我哋用航拍，佢當時以為部機壞咗，以為無咗訊號，原來佢對手凍到郁唔到，同有啲鏡頭我幫手揸機拍，我要除手套影，我隻手都凍到僵咗。」