陳奕迅（Eason）一連25場《Fear and Dreams》演唱會昨晚（25日）又再Encore兩次，第一次唱出2008年推出的新曲加精選專輯《Solidays》的《後台》，這首歌幾乎沒在現場演繹過，令歌迷相當驚喜。

不過難得聖誕夜，歌迷又點會輕易罷休，用返前晚平安夜同一招數，死等Eason再次出場，果然Eason再踏上舞台笑說：「做咩啊？唔使搭車咩？冇Party要去咩？我今晚醒啲㗎啦，都預咗你賴皮，我廢事換衫，至多咪著住走，真係有人走咗喎，證明呢個世界唔係個個都咁賴皮」。

相信大家都估到Eason會唱咩歌，佢話：「雖然唔係好應景呢隻歌，一啲都唔應景嘅，既然你哋想落返去谷底，我咪帶你返落去囉」，接著就響起《Lonely Christmas》的前奏，全場興奮不已。今次個唱狀態極佳的Eason，以真聲唱出高音，不少網民看過片段後表示驚喜，仲大讚係最好聽的現場版本。