【怪雞時尚】隨衫附送透明巨袋載嘢 珍藏小物行到邊show off到邊
撰文：黃正軒
出版：更新：
老一輩成日批評時下後生都是「影像世代」，事無大小都要「手機食先」和自拍，Up相上IG、Snapchat（要知喺00後眼中，Facebook已經娘到嘔...…）晒命，好似無得打卡就會死。
但人類自古以來都係鍾意晒命㗎喇，有好嘢梗係要威畀人睇，Internet出現之前，都係一樣...…
一個透明大袋，裝乜都盡現別人眼前。
重金屬樂迷 Metalheads，特別係鍾情鞭擊金屬的Thrasheads，總有幾件Badge Jacket傍身，去睇Show不難見到有人著住件密麻麻穿滿晒不同樂隊襟章的牛仔褸，佢聽歌咩口味，由Band名徽章可見一班。
同樣地，日本御宅族有痛車文化，車主在單車、私家車或搵食用的貨車上印上鍾愛ACG角色公仔。個「痛」字既有住「疼愛」意味，亦有勇於大庭廣眾公開喜好的不怕羞意思。背囊、隨身包也可扣上大量動漫徽章、扭蛋玩具同毛公仔變成「痛袋」，毫不知恥，力向全世界宣傳自己心頭好和超凡熱情。原宿街頭上，總會看到這樣精心打扮背包的女孩。
Twitter網民@tbkymg最近在某店見到一件改裝衛衣，衫身縫上大大個透明袋，正好用來放限量版動漫精品，帶上街行到邊晒到邊。
由於個袋都幾大，Size同容量及得上女性專用的背囊仔。除咗襟章、集玩式遊戲卡牌同Tsum Tsum之類小型的扭蛋玩具，仲放得入海報、Figure同毛公仔等較大的物件。當然，如果唔驚人知你有米定莫財嘅話，當銀包使亦得；做食物袋擺零食，更加坦蕩型棍。
透明美學向來得人心，千禧年代很多遊戲主機如Gameboy、Dreamcast都推出過透明版，機內電路板清晰可見，感覺好未來好有型。至於透明心巨袋玩法更多元化，放靚嘢晒命之餘，放核突嘢整蠱人一樣過癮，像下面一件就載住N隻唯妙唯肖、腳毛分明的膠曱甴，出街實嚇死寶寶。
救命……