【讀者創作.短篇】為錢出賣自己 麻木後驚醒年輕與夢已是曾經…
實現夢想的確需要錢。然而畢生美其名追夢,卻為錢出賣自己,到頭來賺夠了卻發現錯過了追夢的時間。
【文章原刊於01撐場,歡迎下載香港01 app,與更多作者一同討論喜愛話題。】
我叫阿斌,係一個「以為自己會成為音樂家」嘅鋼琴老師。
我細個彈琴好叻,果陣身邊嘅所有人都覺得,我第日一定會出人頭地。
我就更努力練琴,日以繼夜,終於,我無成功到。
我應該話,都拎過幾個細獎嘅,但係搵唔到錢又唔出名囉。
呢個世界,無結果,就等於失敗。
我入不敷支,唯有教琴幫補下。
我想賺一筆大錢,然後專心進修,做一個真正嘅鋼琴家,踏上國際舞台。
但係,我一直都無中六合彩。
直到有一日,學生Peter支支吾吾咁同我講:「老師,我想考演奏級。」
Peter只係學咗幾個月琴,無天份得黎,仲要懶,一直都無乜進步。
不過,佢有夢想係好事,我就鼓勵佢:「咁你就要努力練琴啦。」
「唔係。」Peter拎咗部機出黎:「呢個係我爸爸新發明嘅『技能學習器』,只要老師撳住呢個掣,諗住彈琴,就會將你嘅鋼琴技能轉移畀我。」
「即係話?」我唔係好明。
「即係你會完全唔識彈琴,而我就擁有演奏級嘅技能。」
Peter拎出一張支票:「老師,我好有誠意。」
支票上嘅銀碼,嚇咗我一跳。
我都聽聞過,Peter阿爸係瘋狂科學家,連續失敗咗九十九次,第一百次都衰埋果種,
但屋企有錢,先容許Peter爸繼續癲落去。
我唔信技能可以轉移,而且有錢,無理由唔收架?
我開開心心咁袋咗張支票,輕輕鬆鬆咁撳個技能學習器。
「成功咗!」Peter大叫。
然後佢坐低彈琴,動作行雲流水。
見到個學生咁叻,作為老師應該好開心,但係我覺得......好陌生,好似我根本唔識彈琴一樣。
唔通,我學咗咁耐嘅琴技,就咁無咗?
Peter安慰我:「你可以再學過架,再學一定容易好多。」
我望一望張支票,果個銀碼,我都唔知教幾多個學生先賺到。
於是,我推晒所有教琴嘅堂,重新學琴。
但學咗幾個月,仲未拾回以前嘅水平,我收到Peter電話:「老師,我想學跳舞。」
「下,我唔識跳舞,你係咪搵錯人?」
「你可以學架嘛。」原來Peter拎咗我嘅鋼琴技能後,係攞咗幾個鋼琴比賽獎,
但佢又開始羨慕其他人識跳舞,而又唔想努力。
「技能學習器」仲未面世,Peter唔想畀咁多人知,所以又請我去學跳舞。
Peter幫我報埋跳舞班,我又開始日夜苦練嘅生活。
學完跳舞,仲有畫畫、書法、運動......我成為咗Peter專用嘅「技能學習者」。
Peter幫我搵老師,我代佢苦練。
過咗幾年,「技能學習器」亦正式上市,改變咗成個世界。
世界充滿不公,但本來仲有一樣野係好公平,就係技能。
無論你幾有錢,幾有天份,要完全掌握一項技能,都要經過無數次嘅苦練。
唔係話你屋企有錢,請個老師畀你,你就會即刻學識晒。
但係「技能學習器」出現後,連僅有嘅公平都消失埋。
我用咗十年時間,幫Peter學晒佢想要嘅所有技能,我亦儲咗一筆錢。
我終於可以重拾我嘅夢想,做一個鋼琴家。
當然,我首先要學識彈琴,我以前嘅鋼琴技能已經賣晒畀Peter。
我想搵個鋼琴老師教我,但一查資料,先發現連最初級嘅鋼琴老師,都收緊幾千蚊個鐘。
因為大部份彈琴嘅人,已經同我一樣,抵受唔到金錢嘅誘惑,將彈琴技能賣晒畀有錢人。
有錢人唔會轉賣技能,更懶得去教人,所以鋼琴老師買少見少。
我搵咗個最平嘅老師,學咗三個月,
之後個老師突然大幅提升學費,因為有人出高價買佢嘅鋼琴技能。
我唔肯交鉅額學費,就只有轉老師,但其他老師就更加貴。
唯一嘅辦法,係我都出高價,買人地嘅技能。
好似唔想交貴租,就只可以買樓一樣,技能嘅價格都愈升愈高,我買唔起。
呢個時候,Peter又搵我。
我問:「你仲有咩想學?」
「無啦,不過我老婆生咗個仔,一個月大,仲未識講野同行路。」
我呆一呆:「好正常啫,一個月梗係唔識講野。」
「我想我個仔做天才丫嘛,所以,我想買你嘅講野技能。」Peter單刀直入。
有更多錢,我就可以買番鋼琴技能。
於是,我將講野、行路、食飯、成人思維......全部賣晒畀Peter個仔。
我好似一個小嬰兒咁,要屋企人照顧至生活到。
到我用咗幾年時間,學番生活基本技能,
Peter又介紹個有錢朋友畀我識,佢朋友都生咗個仔。
有錢賺,無理由唔賺架?
我變成一個專門幫BB仔學野嘅「技能學習者」,佢地要贏在起跑線,我就要重覆起跑線。
勞碌半世,我賺咗好多好多錢,而我亦都好老,關節唔靈活、耳又聽唔清。
臨死前,我望住啲子子孫孫,安排點樣分配遺產。
我喺度諗,點解我會儲咁多錢嘅?唔通我真係覺得銀紙好香?
然後我突然記起,我一開始係想做鋼琴家嘅!
點解我會唔記得咗?係咪某一次將成人思維傳畀BB仔果陣,我連夢想都忘記埋?
我唔知,或者,知道都已經無意義了。
我想做鋼琴家,所以我要搵錢。
然後不斷搵錢搵錢搵錢,我已經忘記咗,我一開始點解要搵錢。
最後,我只剩低好多好多嘅錢。
作者簡介:陳美濤
中文系畢業生,本地小說作者,以「貼地荒誕」為創作路線。對武俠小說情有獨鍾,喜歡分享個人見解。已出版小說:《無緣化蝶》、《港女九陰真經vs女神孫子兵法》等等,另有主持「口述武俠」影片頻道。
作者Facebook專頁:https://www.facebook.com/tomato28
想分享作品給更多人看到? 請即下載香港01 app到01撐場發表精彩創作!或將作品電郵至ugc@hk01.com,隨時敬候來鴻!
【編按:文章題目為編輯所擬,原題為「技能學習器 [短篇小說]」】
(以上文章內容均屬用戶提供,香港01不為任何用戶內容而衍生或遭受之任何損失或損害承擔責任。)