【讀者創作.短篇】龜兔賽跑不勵志 背後暗藏大人們現實遊戲
作為一隻烏龜,我從來無諗過,我會喺跑步上有所成就。
【文章原刊於01撐場,歡迎下載香港01 app,與其他作者一同討論喜愛話題。】
會同兔仔賽跑,都只係想證明我地烏龜唔係懦夫。
宣佈參賽後,無數動物嘲笑我,結果我爆冷勝出。
直至頒獎嘉賓豹哥出場,將獎牌掛喺我身上,我都仲未反應到。
「你要加油!跑步界嘅未來,就靠你啦。」豹哥拍拍我嘅龜殼。
可能你地會覺得,呢啲只係客氣說話,
又或者,呢場只係小型賽事,又唔係森林奧運會。
但我覺得,所有偉大嘅運動員,都係由小型賽事開始嘅。
由果一刻開始,我就承受住成個世界嘅期望。
自此之後,我每日練跑,由朝練到黑。
皇天不負有心龜,無幾耐,我就成為森林裡面跑得最快嘅......龜。
無錯,我只係喺烏龜中跑得最快,但同其他動物比,依然有好遠距離。
於是,我開始到處搵書,鑽研跑步嘅技術,理論與實踐應該並重。
但從來無一本書,講點樣揹住沉重嘅龜殼去賽跑,似乎烏龜天生就唔適合賽跑。
我開始唔明白,當日我點解會跑贏兔仔架呢?
有烏龜朋友話,可能我賽跑果陣,一緊張就爆發潛能,超越極限。
聽落好有道理,我就再報名參加跑步比賽,結果我每一次都跑最後一名。
其他動物笑我不自量力,連我父母都叫我放棄不切實際嘅夢想,乖乖地結婚生蛋。
無可能!我既然贏到一次,點解唔可以贏第二次?
到我再一次參加比賽果陣,我發現咗一個好熟眼嘅參賽者:兔仔,當日輸俾我果隻兔仔。
奇怪地,佢望我嘅眼神,完全無失敗者對勝利者嘅警惕、不安,只有不屑同嘲諷。
我諗唔通。
好快,比賽就開始,我努力向前跑,
我睇住兔仔雪白嘅身影,喺我眼前閃過,
然後所有參賽者嘅身影都一一閃過,唔知邊個衝咗線,歡呼聲響起,
而我,只係跑咗1/4嘅路程。
呢種情況唔係第一次發生,之前我參加比賽,都幾乎係呢個結局。
令我困惑嘅,係兔仔。
原來佢跑得快過我咁多?點解佢當日會輸俾我?
到底係我爆發潛能,定係......果場比賽根本係假嘅!
我唔再參加比賽,而係開始研究果場「龜兔賽跑」。
結果,真係俾我發現咗啲野。
當日,有間財雄勢大嘅賭場,開咗盤口,我作為冷門,賠率當然好高,但幾乎所有動物都賭兔仔贏。
而兔仔,同果間賭場似乎有啲關係。
會唔會係賭場見太多動物賭兔仔贏,故意叫兔仔輸俾我,打假波賺錢呢?
咁講法,我勝利嘅喜悅、我追求夢想嘅努力,全部都係一場笑話?
我接受唔到,我開始搜集證據,證明賭場同兔仔之間有枱底交易。
我勢孤力薄,無幾耐就打草驚蛇。
賭場嘅大佬獅子出現喺我面前:「聽講,你查緊我地嘅野?」
我好堅決咁答:「我知自己死路一條,我已經將罪證分發晒畀我嘅朋友,只要我一死,佢就會向『森林廉政公署』告發你地!」
獅子望住我,我毫不畏懼:「黎啦,要殺就殺。」
獅子突然笑咗:「唔使喊打喊殺,有咩事,我地可以慢慢傾,多個朋友好過多個敵人。」
我冷笑:「你侮辱賽跑,我作為運動員,點會同你做朋友。無論你出幾多錢收買我,用幾多酷刑折磨我,我都唔會屈服!」
「係咩?」獅子笑吟吟咁問:「件事公開咗之後,成個森林都會知,你生命中唯一一場勝利,都係假嘅。
即係話,你根本無跑步天賦,亦無可能做到運動員。」
我呆一呆,獅子繼續講:「你話你將罪證畀咗朋友,
你肯定,佢地會冒住家破龜亡嘅危險,去告發賭場?佢地有你咁熱愛體育?」
其實,我係將罪證畀咗我阿媽。
但獅子咁樣講,我忍唔住諗,阿媽成日掛住「結婚生蛋」,
如果我死咗,佢真係會挺身而出,捍衛體育嘅公平?
定係阿媽會幫我燒完衣紙,偷偷鬧吓獅子「不得好死」,就燒晒啲罪證?
我嘆氣:「就算件事唔公開,我繼續參加比賽,都只會輸,我都做唔到運動員,依然係大家眼中嘅垃圾。」
「唔一定。」獅子突然問:「你想唔想拎『森林奧運會』嘅越野跑金牌?」
森林奧運會係森林最大型嘅賽事,同之前「龜兔賽跑」根本無得比,我連參賽都唔敢諗。
「你有方法令我跑得快?」我連把聲都震埋。
獅子神祕一笑:「無,不過我有方法,令其他動物跑得慢.......」
要做烈士,捍衛體育公平,而且未必成功,最大嘅可能性係死得寂寂無名;
定係一齊打假波,贏個金牌番黎,成為青史留名嘅運動員,光宗耀祖?
我嘅決定,相信大家都估到。
跟住落黎嘅日子,我繼續好努力咁練跑,但內心就好輕鬆。
獅子一樣開咗「森林奧運會」嘅盤口,我依然係冷門,賠率好高,無人投注。
到比賽果日,我唔知獅子係點樣同其他參賽者溝通,
總之,我又贏咗,連豹哥都輸俾我。
呢次頒獎儀式更加盛大,我睇住象徵烏龜嘅旗幟悠悠昇起,我仰起頭,受萬民景仰。
從此,我成為咗賽跑嘅代表。
由完全無跑步天賦嘅烏龜,日夜苦練,終於奪取金牌,幾咁勵志,幾咁熱血。
無論係波鞋、運動飲料定時裝,全部都搵我做代言。
阿媽亦到處同朋友講,佢當日點樣鼓勵我,唔好放棄夢想。
我上咗神枱,有名有利,開咗連鎖健身公司,自己亦唔再參加比賽。
有一日,祕書同我講:「最近有隻熱愛跑步嘅蝸牛,好似查緊我地賽跑嘅內幕。」
我有啲驚訝:「蝸牛?咁得意?」
保鏢阿狼展示出尖銳嘅牙齒,面目猙獰咁問:「老闆,使唔使我去......」
「唔使,叫蝸牛上黎傾吓,睇吓佢有無興趣拎金牌。」
我露出意味深長嘅笑容,望落去,居然有幾分似獅子。
或者,每一隻獅子,都曾經係熱血嘅烏龜。
作者簡介:陳美濤
中文系畢業生,本地小說作者,以「貼地荒誕」為創作路線。對武俠小說情有獨鍾,喜歡分享個人見解。已出版小說:《無緣化蝶》、《港女九陰真經vs女神孫子兵法》等等,另有主持「口述武俠」影片頻道。
作者Facebook專頁:https://www.facebook.com/tomato28
想分享作品給更多人看到? 請即下載香港01 app到01撐場發表精彩創作!或將作品電郵至ugc@hk01.com,隨時敬候來鴻!
【編按:文章題目為編輯所擬,原題為「龜兔賽跑之後 [短篇小說]」】
(以上文章內容均屬用戶提供,香港01不為任何用戶內容而衍生或遭受之任何損失或損害承擔責任。)