美國兒科醫學院：醫生處方自由玩│Sci Papa
暑期剛剛過去，你哋有冇同小朋友玩過夠？
要答呢個問題，首先我哋要先定義乜嘢為止係「玩」先！可能會有人問筆者，「玩」都要定義？！但其實筆者相信，父母們對玩嘅定義真係可以大不同；去上跳舞興趣班算唔算係玩？與同學仔來一場奧數大比拼又係唔係叫玩咗？咁星期日早上輕輕鬆鬆同爺爺嫲嫲飲餐茶呢？
實際上，就連美國兒科學院都認為——「玩」嘅定義係難以捉摸的！
在兒科專業界別就傾向認為，「玩」係要由內到外再由外到返內；首先要發自於內心嘅渴望，然後會表現出一種積極參與嘅態度，繼而再因為玩得投入而從心底裏笑出來！「玩」達致呢種境界，先可稱為「真·玩」或「自由玩」（Free Play）！「真·玩」係自願性質，唔係經過父母深思熟慮所安排，都唔應該有外在目標，如要攞冠軍或者從玩樂中學識咩等等！
大部分小孩嘅內心都會有「玩」嘅渴求，既然佢哋自己識得玩，咁點解仲要有咁多專家提倡家長要俾小孩「玩」？原來偏偏現代社會入面，因為父母都要全職工作養家、小孩自己又有太多興趣班、再加上功課太多等等，佢哋去「玩」嘅時間就被蠶食了。就算係為兒童所安排嘅學前課程，大部分嘅重點都係放於課室內嘅書本內容，並以坐低學習嘅方法，來建立兒童嘅技能。
有見及此，美國兒科學院在2018年8月發表咗一個詳細報告，解釋「玩」對小孩嘅重要性，並要求兒科醫生要多提示家長畀小孩有足夠嘅「真·玩」時間，美國兒科學院並建議，學前課程應通過遊戲而唔係外在動機如考試成績等，來促進孩子嘅內在動機，從而使佢哋真心喜歡學習新事物。
然而，呢份報告更指示兒科醫生，要提醒父母多畀仔女自由玩；就好似叫醫生去處方「玩」畀小孩一樣，期望用「玩」呢種「藥物」令佢哋健康成長。老實講，「玩」都要醫生叫，小孩才可以擁有，可悲不可悲？
有人話，成長於呢個年代嘅香港小孩，大部分都擁有豐富嘅物質生活，比以前嘅小孩幸福；但筆者就幾回味自己個年代嘅童年生活，好少同學或朋友需要額外嘅補習、可以隨時落街同屋村其他小朋友玩唔同嘅遊戲；冇iPad但有好多朋友、冇好多玩具但有唔少玩伴；計我話，以童年來講，我們嘅年代先係黃金童年嘅年代啊——至少唔駛醫生叫，先至有得玩吖嘛！
參考資料：http://pediatrics.aappublications.org/content/early/2018/08/16/peds.2018-2058
Sci Papa （專頁：Scientific Papa）