【溫多娜手記】戶戶送再夥拍麥當勞 今次搞分子雪糕快閃店
撰文：溫多娜
出版：更新：
炎炎夏日，出街都要做足防曬措施，以免中暑。尋日中午，戶戶送夥拍麥當勞和分子雪糕專門店，響旺角街頭搞左個分子雪糕快閃店，向途人大派雪糕「降溫」，雪糕口味相當特別，分別有蘑菇安格斯、芝士奶蓋芒芒、將軍漢堡同埋脆香雞翼。
戶戶送香港區經理羅家聰話，今次活動係公司同麥當勞合作3年，以及Mcafe獨家登錄戶戶送平台嘅慶祝活動，公司就挑選咗4個麥當勞經典又有話題性嘅產品，製成4款分子雪糕，自己最鐘意食脆香雞翼，覺得個雪糕味道同原本產品好似，概念好獨特。
圖為蘑茹安格斯味雪糕，雪糕上鋪有少量煙肉碎。
之前戶戶送都有搞類似快閃活動，例如公司3月就同媽咪雞蛋仔合作，開咗一日雞蛋仔快閃店，向途人免費派創新口味雞蛋仔，例如：大白兔糖、M&M'S花生朱古力、Oreo朱古力碎、童星點心麵、魚肉腸等等。羅家聰仲賣關子話，未來會考慮同麥當勞做唔同類型合作，例如線上線下推廣活動，若果今次活動反應熱烈，或會考慮再次推出同類型活動。