【成也網絡‧敗也網絡】山野女生談人身攻擊 「話豬西我都冇法」
網絡既可以捧紅一個人，也可以將一個人慘變過街老鼠。「山野‧女生」創辦人黃婷欣（Tanya）去年9月成立facebook專頁便已急速冒起，不過短短半年後狙擊專頁也乘勢而起，一個月無間斷的帖文令山野‧女生停止運作。停運至今又再半年，這段時間Tanya曾離港赴美進修兼爬雪山，視野拉闊後平心靜氣看回從前，她堅定表示從沒後悔營運行山平台，只感嘆香港負能量有點多。
【點擊「全螢幕」觀看影片】
這一年來，黃婷欣（Tanya）人生充滿高低起伏。先是一手一腳創辦的行山平台「山野‧女生」僅成立個多月便有逾7,000個讚好，繼而接受接二連三的傳媒訪問，成為鎂光燈下的KOL。然而突如其來的名氣總是短暫的，半年後以類近名字自稱的「山野‧男生」來勢洶洶，批評文章資料錯誤及Tanya行山習慣，更質疑女生平台為求賺錢不擇手段。連續狙擊個多月後，山野‧女生宣佈重整內容、暫停更新，註冊的網頁就變成「Error」，Tanya就往美國進修。
接近七個月後，已回港的Tanya再走到鎂光燈前，談談她走過的高山低谷。
報讀山藝課程只求充實自己面前的Tanya膚色較以往更為黝黑，可能是在雪山曬黑之故。過去數月她遠走美國，遊走美國及加拿大之間的太平洋西北地區，在雪山上生活近一個月，更讀了Outdoor Educator的課程以充實自己。
比起香港事事煩心，她喜愛在山上的寧靜，「上到山冇network，冇網絡就與世隔絕。冇咩嘢煩惱，成個世界好似空咗、得返自己，就放鬆咗好多」。放鬆是因為遠離了網絡上的攻擊？Tanya笑笑口否認心情受負評影響，「我唔會因為佢講到我好負面而有hard feeling，反而係嘥我精神去對付一啲無謂嘅意見。每日都收到朋友話，佢哋講你咩咩咩，屋企人又話，佢哋又咁樣講講講你」。
被罵做雞、收兵也不太介懷
她口中說的無謂意見，是指那些人身攻擊。「佢哋話我豬西啦、做雞啦、收兵啦，聽落都幾好笑，我只可以講話廣東話博大精深，粗口用得好極致。」Tanya笑着回應人身攻擊，「樣嘅問題我都冇辦法，身體髮膚受諸父母。」
Bra top行山？ 強調為散熱才除衫
被評樣子、收兵，Tanya尚且一笑帶過，但談及她行山習慣，她的語氣隨即變得無奈，「話我博上位啦，著到咁少布，特登上山著bra top」。在網民眼中，她的確成為了「bra top行山」的「代表」，山野‧男生就曾以bra top女神來稱呼Tanya。她形容被如此定位是無辜，「男仔上到山做運動熱都除衫，咁女仔生理機能都一樣，都係熱就想散熱，又唔係特登谷行個胸、著到咁低得咁低」，她強調是在山上感到炎熱才脫下衣服，更多是穿上了背心，否認只穿運動內衣行山。
Set頭行山？ 只是街邊賣的「師奶夾」其實也不只是上身，Tanya的全身衣著也常引來爭議。她經常背心加短褲，跟政府廣告鼓勵戶外活動穿淺色長袖衣褲的形象，完全背道而馳。她就如此為自己的穿衣風格辯護：「每個人都應該有自己嘅風格㗎，我覺得我舒服嘅風格就係著背心短褲，涼浸浸，同花草樹木零距離接觸。」除此之外，她也常被指「set頭行山」。Tanya說她一年365日都是這樣處理長髮，當中的訣竅是——街邊10元兩個的「師奶夾」（鯊魚夾），而非如網民所言特意為頭髮造型。就網民批評如數家珍，其實她也有點憤怒？「嬲又真係冇嬲喎，咁佢哋講我鼻扁咁佢又冇講錯喎。咁我又冇乜顧嗰啲外表，咁由得佢啦。」Tanya又再笑笑口。
承認資訊錯誤為自己責任
談回文章質素，她收起笑容，直認資訊有誤，又坦言這些是她最初收到、具建設性的意見，承認自己有責任，「當然分享嗰個人有責任，要make sure啲資訊係正確㗎啦。有愈多constructive feedback愈好，愈多feedback嘅時候你可以知道自己有邊啲地方唔夠好，例如佢話我啲文章唔係有咩專業人士去寫嘅時候，咁我哋可以出返教練嘅名、寫返個reference」。
拖鞋行山？ 了解自己能力就可以
對她而言，不具建設性的意見，是那些針對她穿拖鞋上山的指點。「如果你自己好肯定呢副裝束係唔會出事嘅，你好清楚你能力去到邊，咁喺個人選擇嚟講係冇問題。」
自己做錯的地方，她認為是誤將自己穿拖鞋的照片放到平台之中，「係唔小心夾雜咗一、兩幅，但係我哋講資訊嘅時候呢，真係有提醒上山一定要帶足裝備，著有保護性能嘅鞋，呢啲係我哋講資訊嘅時候一定會講嘅」。她自言平台上的她，跟私人帳戶上的她角色不同，如果將兩者混為一談，視她為絕對的榜樣，要求就略為太高。
由山系女神變為吊狗公的女神
成也網絡，敗也網絡。當初傳媒、網民將她捧為山系女神，其後她卻被定性為吊狗公的女神。她大嘆無辜，「我自己又唔係靚女又矮，咁你畀咗呢個名銜我，係好重嘅負擔，變相一有人批評你個外表咁就瀨野喇，『你女神？鼻又扁、腳又短，憑咩做女神吖』」。苦笑後她續說，「喺網絡你係可以升得好快，亦都可以踩到你好低。好容易一吓將你由好勁、好勁，踩到去收狗公嘅女神、扁鼻女神、博上位嘅女人」。
實現初衷 所以不後悔
那麼有沒有後悔開設山野‧女生？這個問題她想必也反覆思量了很多遍。「後悔就一定唔會後悔」，Tanya非常堅定地說，她想透過平台實踐的目的其實已經達到，「有人會因為我分享嘅嘢而喜歡大自然、識得去感受或者識得去保護環境，呢個係我最終想藉呢個平台得出嘅效果」。她說日後想好怎樣重新出發，便會重開山野‧女生平台。
堅持並實現初衷，是令她看淡外界攻擊的主要原因，「你只需要忠於你自己相信嘅嘢、你自己嘅目標，你認為啱就去做。一路行落去，一路去達到你想達嘅目的」。不屈膝於網民跟前的Tanya如是說。
更多相關文章：
【整容背後】22歲整形30次 隆鼻失敗才醒覺：為男友整容好傻
麻甩不是男人專利 插畫家C孔：我係一個扮女人嘅大叔
80後祼辭兩年 走遍60國家 「你返工唔開心 點解要繼續返？」