【平絕港島】筲箕灣麵包小店日做17小時 $2.5菠蘿雞尾造福街坊
「啲客想食又平又靚嘅面包，咁無乜所謂嘅，我都捱下面包囉。」開到成巷成市的連鎖麵包店年連加價，不少人大呻又貴又食空氣，但筲箕灣仍有一間開業超過30年的家庭式麵包店，一家三口日做十多小時，為做出全筲箕灣最便宜、又足料的麵包。
滿溢餅店總是洋溢著香濃的麵包香氣，原因無非是那個幾乎由開檔焗到收檔的餅房，店面高呼一聲「提子無喇」、「雞尾就賣晒」，餅房裡便馬上打蛋、搓麵糰。這種即叫即焗做餅模式，讓街坊吃到最新鮮熱燙的麵包。
家庭式作業 日造超過30款包點
滿溢餅店又可能是全港提供最多麵包蛋糕款式的餅店，問老闆棠哥、老闆娘雲姐，以至第二代店主Toni，無一能準確答到滿溢到底做多少款麵包。「菠蘿、雞尾、鹹餐、硬豬、提子…大蛋糕、紙包蛋糕、拿破崙…嗯…應該有十幾款。」「應該有二十款以上。」按記者數算，連同炸油條、煎堆、車輪包、十字包、老婆餅等甚少麵包店做的款式，滿溢至少有做三十款麵包蛋糕，但其實一家三口連同每日兼職數小時的師傅，這個餅房只有四人輪流做餅。
「同人講炸油炸鬼嗰間麵包舖，行內就知係筲箕灣嗰間，好多人想跟我學炸，係呢樣嘢幾有滿足感！」老闆棠哥自豪說，講得出的餅他幾乎都會做，「不過唔夠時間做，而家都做成17個鐘。」
有其父必有其子，眼前的店二代Toni白哲年輕，還以為是初出茅蘆的畢業生，原來他已經在父母經營的「滿溢餅店」工作13年，也跟父母一樣捱得。「18歲開始落嚟幫手，做到而家31歲。每日7點落舖做到8點收工，中間落場一陣。」
由廿多歲造蛋糕開始，Toni已自行研究食譜和烘焗時間，「每款都重覆整6次以上，研究咗成個月，不停咁整，第一次焗出黎，『哦唔得』，掉左去，跟住又再諗過點樣整到食落去又鬆、甜度啱啱好，火候都好重要，各方面都要配合。」
元朗攝影老店8元一打學生相 老闆：做得幾耐就幾耐
滿溢餅店多款麵包售價由$2.5起
月中無休 夏天熱到暈
現時一般打工仔月休6-8日，基本外加12日勞工假及7日年假，但滿溢是自己生意，Toni自然沒有打工仔的福利，「一個月返31日就真係返足31日。中秋、新年有得放，一般無特別假期就無得放，見到啲人放假可以連住紅日、禮拜日假期放到4、5日，可以去下旅行、可以休息下，都幾羨慕。」
辛苦的還不止是長工時，「夏天，夏天係最熱，成35、6度，打風時又特別焗，就更加辛苦，真係抖唔到氣想暈，大汗疊細汗，你企係到唔郁都會流好多汗。」
租金材料連年升
要捱，全因租金不斷上漲，但仍想讓這個老區的老人家吃到平麵包。
「租金成本好貴，三年就要加一次租，簽新約就加兩成，而家都……差唔多6位數喇。」以店裡銷量最好的菠蘿、雞尾、硬豬等$2.5的麵包計算，亦即要賣出4萬個才能抵銷租金開支。
「街坊都話全筲箕灣我哋最平」，租金持續加，但Toni指滿溢對上一次加價已經是去年新年，僅部分麵包加價5毫子，「呢度舊區同老人家多，所以盡量咪賣平啲，唔好賣咁貴囉。」加上麵粉、糖等成本持續上升，唯一可以降低的開支便是自己的人工，「啲客想食又平又靚嘅面包，咁無乜所謂嘅，我都捱下面包囉。」Toni笑著說。
「足料過連鎖店！」
有路過買麵包的街坊說，每天都要來買麵包，「抵食、大件囉！我先生日日都要食大蛋糕、紙包嗰啲。」也有年輕情侶吃過又吃，「之前食過好食又返嚟買，唔似連鎖店啲包，好足料！沙翁最好食！夠多糖。」
「滿足感來自啲客，啲客食完之後，會返轉頭幫襯話，蛋糕好好食，又大又靚，比起出面果d大公司好食，呢樣我最開心！」對Toni而言，客人一句「好吃！」就是經營麵包店的最大滿足感來源。