常有人說，一生的挈友必有中學同學在內。中學同學朝見口晚見面，遇著啱傾且住處相近者，更易一拍即合。中一時已相識的Anna和Gemma，中學時期已是「孖公仔」，縱然現在已投身社會，但兩人關係並無疏離，仍是一對好閏蜜。Anna受訪時更激動落淚，「我好慶幸喺呢個人生入面認識到佢（Gemma）！」

有一種友誼叫中學同學

我覺得中學識嘅朋友係最正㗎！

數數手指，Anna和Gemma已經認識約十年，現時一人是婚禮統籌，一人任理財策劃；雖然並非如以往般天天見面，「大個咗自己有自己生活，唔會話一定要成日見」，但兩人均指「一見返佢（對方），中學個味道就返嚟」。

像對孖公仔報喜

甚麼是中學的味道？回想當年在校園認識對方，Gemma指兩人會「一齊逃課呀、一齊寸啲老師呀、一齊偷偷哋返大陸」，還有她們最愛的打排球。中學時代的好友，會以「孖公仔」為榮，Anna和Gemma亦如是。「一齊買一樣嘅鞋啦、襪啦、跟住紮頭髮（橡筋）啦、書包啦、著衫呀、鍊呀，全部都一樣款，但係唔同顏色咁樣」。

會鍾意對方鍾意嘅嘢，即係可能佢好鍾意綠色呀、花花呀，跟住我又會鍾意！

Gemma笑言，「我哋已經習慣咗，做咩都一齊、買咩都一齊、食咩都一齊」。就連兩人談戀愛後，活動也變成四人行，「大家啲男朋友一定要接受到有我哋呢個friend」。

好朋友會做的事……

另看：有一種孤獨叫創業　90後甜品師哭訴：羨慕別人有同事分享扶持

有一次，Anna希望出海看鯨鯊，縱然當時Gemma不知鯨鯊為何物，「就為咗睇佢上嚟撥一撥條尾，然後我地嗰日要（凌晨）三點幾鐘起身，五點要去到嗰度」。

這樣傻嗎？

Gemma指，「佢（Anna）想做咪陪佢做囉！」Gemma補充，「對方有啲咩要求，（另一人）都會盡量去滿足佢！」

中學同學 VS 同事

隨年紀漸長，生活圈子亦有所不同。上班認識的同事，就算比較要好，亦難以昇華至「盡訴心中情」的級數。Anna指，投身社會後，「同事之間好多時候都夾雜咗一個競爭性喺度，唔同話中學一齊去打下波、一齊去畫下畫、去食下糖水咁」，Gemma亦同意，「中學識嘅朋友係最真嘅！」

現在兩人亦不時見面，去旅行、出席派對、甚至接受傳媒訪問，「只要就到時間，都即刻會（say）yes」。

另看：【演員血淚】入行10年沒人識？ 拍完場戲被製片話「冇預你食飯」

秘密只會講你知

「人生中嘅秘密，真係得佢知囉！」Gemma指，面對Anna，「你自己會放心同佢講，因為佢唔會講比其他人知」。故私密如床事，也會和Anna分享！

Anna則認為Gemma「一點就明」，「有時件事唔洗講太多，佢會明白我想講嘅嘢」。

在另一人不在場的情況下，記者分別問Anna和Gemma，有甚麼歌最能代表兩人的關係？兩人不約而同回答是電影《閏蜜》的主題曲，「有句歌詞係講（大家）一齊到老，即係都諗住大家會一齊過下半世」。

Anna更是忍不住流淚，「除咗屋企人之外嘅話，其實佢（Gemma）真係幾重要嘅人嚟，我好慶幸喺我人生入面認識到佢，好多謝佢陪我行咗呢十幾年，同我經歷咗好多嘢」。

友誼之路轉眼走過十年，說長不長、說短不短，Anna明言「我餘生都係想繼續同佢做好朋友！」