賀歲片《夜王》，由黃子華、鄭秀文主演，《毒舌大狀》導演吳煒倫執導，今日（23/1）電影公司上載多一條最新預告，由飾演歡哥的黃子華，教一眾小姐們的待客之道，期間不失子華式風格，金句盡出，句句都要袋穩，連Sammi都有提供。

在最新預告中，歡哥為重整旗鼓，決定要親身授課，向囡囡灌輸待客之道，歡哥名言︰「世界艱難，有技巧就唔難」，要贏就要識捉客人心理︰「佢哋係畀錢買尊嚴」。至於點解讓客人覺得有尊嚴，就要投其所好「乜嘢都要傾，所以你乜嘢都要識」，最重要係令對方覺得啱傾，啱傾就有運行︰「搭車送你一程，搭啱嗲，可能送你一層太古城。」真係句句都入字典，連Sammi都拋出一句︰「天下男人皆可殺」要求囡囡們去盡。

而預告壓軸，就由楊偉倫飾演的土地，帶一班新女畀子華過目，不過就件件都係極品，有瘦猛猛，有驅風元老，仲有自信心爆棚的Franchesca又名葵芳（舞台劇演員蔡蕙琪），一口譚仔話的中女格局，但自稱19歲半，非常出眾。雖然預告只有她有對白，但從背後畫面可見，足有「後宮佳麗三千」的氣勢，期待入場觀摩。