爆谷一周|黃子華暫別導演專心演戲 「喜劇創作最怕聽到五個字」
由賀歲轉戰中系,集愛情、親情、兄弟情於一身的溫情電影《飯戲攻心》,由黃子華、鄧麗欣(Stephy)、張繼聰、王菀之(Ivana)、林明禎及陳湛文(Peter)主演,將於9月7日中秋檔上映。導演陳詠燊,夥拍主角黃子華及王菀之,一同上由谷德昭主持的ViuTV節目《爆谷一周》接受訪問。
偶像答應演出叫出來
節目一來,谷德昭先問陳詠燊當初撰寫劇本,是否一早決定由黃子華演出?陳詠燊坦言頭幾稿都未有人選,直至老闆拍板開拍,商量下便出現黃子華。陳詠燊︰「好記當時好似星期五左右寄劇本給他,很快,下個星期一、二便收到電影公司通知︰『子華接喎』,我當時跟老婆在行超市都忍不住叫了出來。」問到子華《飯戲攻心》劇本的吸引力?「我看了10場戲,發現都是同一場口,斷估你唔會一直困在這裡嘛,結果真係,但又幾好睇。」
靚女陪伴唔自在
谷德昭提到今次子華在《飯戲攻心》艷福不淺,有兩位年輕貌美的女伴鄧麗欣(Stephy)與林明禎,但子華聽到便一副「有苦自己知」的模樣。「當年我話劉青雲同阿Sa(蔡卓妍)演情侶,唔好啦!大佬,兩父女咁,估唔到輪到我要做,自己周身唔聚財。最慘仲要失戀,去到呢個年紀唔想再失戀。所以今次係最後一次,或者下次要找年紀相近的。」
事實上,子華演愛情情節都非常投入去演,因為只有投入才演出當中的愛。「當時真係好愛Stephy,愛到未埋位見到張繼聰跟她雞啄唔斷都會妒忌。而且我對她完全陌生,只看過她幾部電影,去到現場便慢慢了解她,原來她這麼高,原來手掌長過我,我在現場經常遙遠偷望她,不知她有沒有發現。」
「呢場笑咩呀」好有壓力
問到子華近況,他最近已拍起另一部電影《毒舌大狀》,問到會否再執導,子華都稱暫時以演戲為主。「做導演需要好大好大的能量,再做導演都或者只專心執導,不會同時擔任兩個崗位。」不過子華亦對度喜劇有股無名的壓力,這源於跟許冠文合作《神算》時發現。「我跟他度《神算》,每次來到,許冠文便會問︰『呢場笑咩呀?』哎呀,死喇!心諗會唔會可以有場喜劇唔使笑呢?漸漸『呢場笑咩呀?』這五個字,覺得是對喜劇創作者好殘酷的對待,唔理你今場要整死隻杯,定整攣對筷子,都一定要笑。」而到拍攝《一蚊雞保鑣》和《乜代宗師》,都發現導演崗位有太多事情兼顧,故暫且都想放下,反而想全心全意去拍一些瘋狂喜劇,令大家都開心下。