【任噏亂評】2017年樂壇hit過啲乜? 講返十年前反而仲記得

撰文:郭敏玲
出版:更新:
呢六隻係2007年最出色嘅唱片。(網上圖片)

回顧20年前嘅香港,的而且確有好多光輝嘅時刻,包括樂壇。當時四大天王鼎立,王菲、鄭秀文佔盡風頭;仲有陳奕迅、謝霆鋒作為後起之秀,當刻相信香港樂壇仲可以有排玩。只不過,若要數呢半年有邊幾首hit歌,目前為止絞盡腦汁都只諗到ToNick的《長相廝守》。有邊個會知道20年後嘅今日,襟聽嘅歌越來越少,香港樂壇發展越見疲弱,千篇一律、迎合市場嘅歌滿一籮匡;或者受無力感操縱,概念大碟亦買少見少。概括嚟講,呢個現象由2007年後開始出現;另一個角度而言,2007年係香港樂壇最後一個巔峰。

張敬軒曾經坦言,要陳奕迅古巨基退下來才有機會上。可是,讓大家記住嘅新世代歌手,真係十隻手指數得完,曾經活躍嘅歌手,或者志不在此,可能轉戰到其他地方。(資料圖片)

講起歌方面,至少唔係一首半首好聽嘅歌咁簡單,令人記到入腦嘅歌,至少都有50首。當年最hit,就係張敬軒推出新曲加精選,夾住首新歌《酷愛》,仲記得朋友、街頭、店鋪都係播住「難道愛愛愛愛我對愛情已死心…」,真正上腦歌就係呢啲。唔止咁,仲有陳奕迅。不論快慢歌,《Crying In the Party》、《熱島小夜曲》、《時代巨輪》等,Eason歌曲編排充滿驚喜,當年都好hit,仲記得當年演唱會仲好好睇;其次係古巨基《愛回家》;容祖兒《愛一個上一課》、《心花怒放》等等,講緊一個歌手攬住幾首好歌,並唔係而家好努力諗得一首歌,而旋律說唔上有甚麼變化。

至於講緊實力歌手嘅存在,本來喺樂壇佔一席位嘅陳奕迅、容祖兒及古巨基,佢哋都能夠承接到07年前嘅氣勢。佢哋本來已經有一定資歷、經驗及人氣,音樂亦建基呢啲優厚條件去創作,尋求突破。仲記唔記得古巨基隻《Human...我生》同陳奕迅嘅《What's Going On...?》同《Life Continues...》?呢幾隻碟將「概念大碟」呢個Term發揮到極致,《愛得太遲》、《富士山下》唱到成行成市,往後都可以食住個勢,推出高質嘅歌,避免令K歌濫竽充數。仲有後起之秀,好似側田、張敬軒、王菀之等,佢哋都係唱作實力派,產量都好豐富,《男人KTV》、《頭條新聞》、《面具》等,短短出道幾年寫到好歌,已經好厲害。張敬軒亦因為《酷愛》慢慢建立佢個人事業嘅頂峰,引申到後來幾年,陳奕迅、李克勤減產,甚至前者唔參與頒獎典禮,都有張敬軒做支撐。

當陳奕迅都唔想再玩,就知道香港樂壇玩唔到幾耐。(網上圖片)

人多、歌好,自然頒獎典禮都會好睇,有種爭崩頭、緊湊嘅感覺。當陳奕迅依然有對手,對手仲係撈得仲耐過佢嘅李克勤、古巨基,容祖兒雖然無庸置疑拎女歌手,但至少仲可以講下謝安琪、何韻詩緊接再後,有機會追上天后,連啲Fans都仲有個目標針對下…然後再望下新人,係就係冇2005年又張敬軒、方大同、側田、衛蘭咁勁,但都仲有陳柏宇、鄭欣宜,佢哋嘅歌都有一定話題性,起碼你都會識唱「我會消失,讓自己一個抑鬱」,陳柏宇拎新人王都實至名歸啊。

呢三個可能係未來十年嘅樂壇軸心。(資料圖片)

冇錯,香港樂壇之後一蹶不振,TVB同五大唱片公司版權風波確實係一個誘因,但解決之後呢?仍活躍香港樂壇嘅歌手,只得寥寥數人。陳奕迅2010年代玩過唔少新風格、新概念,係就係好聽。不過作為音樂創作者嚟講,「無敵是最寂寞」,冇對手、得自己一條友賣創新,真係有意思咩?其他歌手都開始北望神州,自己喺度力撐廣東歌,唔攰咩?係就係依家多咗好多新人,但每年新人質素參差,唱作類型為求穩陣,玩緊嘅歌路呢十年嚟都冇乜變化,真心要等下一個巔峰係幾時?至少回顧2007年嘅時候,係有歌曲、歌手值得懷念,每個月都有驚喜,同依家坐等一首Hit歌,感覺差好遠。