【娛樂回歸20年】網劇係王道? 亞視葉家寶:後生仔覺得電視老土

撰文:陳浩賢
出版:更新:

去年4月1日,亞視熄機,不少人當笑話一則收看,在家中印印腳食花生,但跟亞視憂戚與共,前亞視執董及高級副總裁葉家寶,卻難掩依依不捨之情,這位亞視老臣子,見證過97年前無綫跟亞視的競爭歲月,亦身處過亞視走下坡的艱苦日子,甚至因為亞視欠薪,而要被罰款15萬,對亞視始終有一份感情。

葉家寶表示現時電視業流失了後生的一批觀眾,他們喜歡自主,幾時睇劇都要自己話事。(資料圖片)

曾幾何時,亞視確曾有過輝煌的歲月,就是富商林百欣入主的黃金十年,雖然仍處於弱勢,但節目已經保持到一定水準,甚至有威脅到無綫的節目誕生,如1994年的《今日睇真D》,資訊及娛樂兼備的突破手法,為亞視贏得口碑收視,無綫更急忙推出同類型節目《城市追擊》迎戰,在劇集方面亦有佳作,而且涉及內地文革等敏感題材的劇集,如90年的《還看今朝》、《暴雨燃燒》,完全沒有自我「河蟹」。

不過自從1998年開始,內地商人相繼入主亞視,亞視的製作方針,亦改動得遠離了港人口味,顛峰之作已是《我和殭屍有個約會》,之後逐步減少自家製作,只以外購劇充數,亦成為了亞視遠離觀眾的原因之一。葉家寶表示:「早期我哋係有拍劇嘅,亦有買劇返嚟播,當時都好成功,好似《三國演義》,包裝咗之後出街都好多人講,後期嘅《雍正皇朝》都係買返嚟,都好多人追,所以到最後都係內容為王。」

有指因為回歸後,電視台相繼要維穩,所以不再拍攝敏感題材?「我又唔係咁睇,回歸之後好多題材都係照做,只係後期呢啲節目作品愈來愈多,變咗以前《還看今朝》講文革,係電視嚟講好出位,但後期連內地電視劇都有講,雖然未必講得咁深入,觀眾多咗接觸就唔會覺得咁特別,所以我哋都唔再追求講呢啲嘢囉。講得多觀眾都未必想睇,電視都係帶俾觀眾娛樂、教育,唔係用來成日諗啲傷痛嘅嘢。」

《我和殭屍有個約會》是亞視的皇牌製作,更連續拍足三齣,萬綺雯的長腿馬小玲至今仍記憶猶新。(網上圖片)
《雍正皇朝》也是亞視購自內地的劇集,當年卻甚有口碑。(網上圖片)

葉家寶講到近年成個睇電視的習慣都已經改變,「好多人都同我講都唔知幾多年無睇電視啦,同埋佢哋鍾意睇啲碎片化嘅嘢,可能係手機睇下片。早10年8年又興起韓劇熱潮,跟住內地電視嘅發展亦好迅速,佢哋嘅製作費,香港無得同佢比嘅,觀眾層面大,13億觀眾,1億觀眾睇都不得了啦,香港2、3百萬人睇已經要慶功啦,所以內地可以吸納好高嘅廣告價錢,花好大嘅製作費去製作一個節目,搵好多明星買好多版權,幾十部cam去做一個綜藝節目,13輯嘅節目已經可以使2、3億嘅製作費,對我哋嚟講根本係諗都冇諗過,可能已經係我哋一年嘅成本。」

葉家寶表示近10年韓劇興起,本地觀眾的煲劇口味亦有改變。(網上圖片)

現時無綫的製作,題材上已經是背靠祖國,北望神州,更被網民指已經不是屬於香港人的電視台,甚至揶揄是「CCTVB」。葉家寶卻認為只是因為被外邊比下去,「香港本土節目依家都有嘅,只係水平有冇下降呢?睇得外邊嘅嘢多,韓劇美劇內地劇,真係拍得好有水平喎,慢慢就忽略本土嘅電視劇囉。本地嘅劇題材又翻炒呀,有啲演員又做得好誇張,對白又嚟嚟去去嗰幾句,情節亦都唔吸引,一套劇成功就猛拍續集,當然香港亦都好多製作人嘅流失,《射鵰》都係香港人拍啦。」

葉家寶表示現時本地製作水平下降,難免被美劇韓劇內地劇比下去。(資料圖片)

但葉家寶對於無綫經常被指拍「膠劇」,也有為昔日對手抱不平,「有時係雞同雞蛋嘅問題,拍啲有新意嘅嘢,觀眾又唔接受喎,無綫都有《天與地》,好新嘅題材,結果啲收視又唔得啦,又要去返婆媽劇,但啲人又話老土,唔會睇呀。」葉家寶說現時電視業面對的難題,是流失了後生的一群,「佢哋好難觸摸架啦,成個生態都改變咗,鍾意自己話事,睇乜咪睇乜囉,使乜睇你電視台嘅嘢,睇電視已經變成係一件好老土,好落後嘅事。」

你可能感興趣