好耐無出席公開活動林家謙，今午現身昂坪昂360為「多啦A夢&FRIENDS」展覽揭幕，仲獻唱《神奇的糊塗魔藥》。家謙接受訪問時，表示最想要多啦A夢嘅記憶麵包，仲話想送誠實豆沙包俾張敬軒，事關對方隨年紀增長，係時候要補補。

提到4月時嘅CHILL CLUB頒獎禮，Tyson 代其領獎時，在台上講「唔係我勁 係你哋廢」，家謙表示一早知道會有此言論，只係自己「無approved 但亦無反對，無特別唔畀佢做」，他又表示自己嘅原意係「唔係我勁，係我好彩」，家謙又話如果有機會代Tyson 領獎，會多謝自己或保持沉默。

提到Tyson日前求婚成功，家謙表示個多月前已知悉，仲笑言為此押後專輯推出嘅日期。「因大件事，廢是搶咗佢風頭。（會唔會寫歌送俾佢？）唔會，佢自己都識。（覺唔覺佢喺演唱會求婚好sweet ?）佢公器私用啫，都sweet嘅，因為在場見證嘅人都係fans，個畫面都開心。」不過問到會唔會參考以上求婚方式時，家謙仲唱出「一個人原來都可以盡興」並謂感情事順其自然。