【天地男兒】羅嘉良奸角上位　古天樂張智霖爭女成焦點

以往晚上8點半至10點半係劇集黃金時段，一家人放工放學坐低食飯齊齊睇電視。隨住香港人生活習慣改變，深夜重播時段先係網民追劇黃金時間。無綫依家每晚都重播經典劇，《天地豪情》播到尾聲，有傳接棒嘅將會係1996年戚其義嘅作品《天地男兒》，呢套劇雲集鄭少秋、羅嘉良、張智霖、古天樂、陳松伶、宣萱、伍詠薇、張可頤等好戲之人，絕對令人期待。

《天地男兒》全劇一共65集，講述一段香港豪門家族鬥爭、兩代恩怨恨仇、感情糾葛故事。呢套劇亦被視為羅嘉良上位之作，劇中面對演技超群嘅鄭少秋毫不怯場，他所飾演嘅徐家立，由善轉惡成為大反派，演技發揮得淋漓盡致﹗不可或缺嘅感情線錯綜複雜，古天樂鍾意陳松伶，陳松伶鍾意張智霖，張智霖鍾意宣萱，宣萱鍾意羅嘉良，仲有鄭少秋伍詠薇配成一對。睇番當年劇照，各人都保養得宜，除咗古天樂由白轉黑，各人樣貌幾乎無變，顏值相當高呀﹗

雲集當年多位實力派演員，好似已故嘅資深演員關海山及鮑方，有多場對手戲，戲味甚濃。當年《天地男兒》播出成績亦相當唔錯，平均收視30點最高達到38點，係1996年無綫最高收視劇集第三位（第一位《西遊記》，第二位《刑事偵緝檔案2》），加上此劇21年來只於2011在TVB星河頻道重播，呢次重播令網民紛紛表示好期待。