【專訪】羅敏莊5年後移民泰國　二按香港物業搏做KOL

唔少香港人都鍾意去泰國旅行，因為無論買同食都價廉物美，近年經常舉家泰遊嘅羅敏莊更索性在當地置業，甚至主動搵地產商合作並開設專頁「我要睇樓團」，唔賺人仔賺泰銖感覺如何？羅敏莊話全數自費，皆因要做KOL首先要唔怕蝕，而睇樓、醫療、教育學府全部都係佢長遠發展項目。

羅敏莊近年為照顧愛女陳禛，刻意減少幕前工作，囡囡才剛升讀國際學校year １，但她與老公陳國邦已計劃5年後舉家移民泰國，提到當地政局不穩，但羅敏莊笑言香港也不見得好。「泰國除遊戲設施外，連小朋友廁所都有，當地人對小朋友亦好有愛心，以媽媽的角度來看，係好適合小朋友，所以近幾年會諗退休之後可唔可搬去，一來自己好怕凍，二來那邊生活好悠閒，於是就開始留意當地樓盤。」由最初的百萬預算，到三百萬成交價雖然是有所出入，但800多呎連家電，以及頂樓的sky pool，且地段一流，羅敏莊多次大讚「好抵」，而在搵樓的過程中，由於大部分資料只有泰文或英文，加上不少朋友紛紛向她取經，令羅敏莊頓感有發展空間，隨即主動「撩」地產商合作，讓他們提供樓盤作介紹之用。「好多人以為我有收錢，但唔係囉，機票、酒店都係自費，但我覺得無所謂，當投資在自己身上，希望成為一個icon，有人喺泰國置業時會來問問我意見。」

陳國邦：有事咪住返屋邨

首次做KOL，羅敏莊認為有更多進步以及改善的空間，而剛入手的樓盤，也打算放租，希望可以藉此有更多經驗可以分享。將香港的物業二按，並以一炮過形式繳付泰國的樓價，羅敏莊說老公陳國邦當初也有點擔心。「我跟他說趁自己有能力咪當儲錢去做囉，況且而家要出租，更不用擔心，其實本身都係供萬幾元，不會太有生活上承擔，男人多走一步令自己生活更好，又或者佢覺得呢層樓（香港）都供完，做咩又搞多層。」其實羅敏莊一早諗定，將來撤離香港的話，出租名下物業。「我放租3萬，喺泰國當9萬使㗎啦。」如此實際，羅敏莊認為是山羊座的關係，而陳國邦則是殺到埋嚟再算的水瓶座。「佢成日都話有事咪住返屋邨囉，我話唔會，唔係屋邨唔好，但人要向前行，同埋屋邨唔係咁易住，佢真係食米唔知米貴。」

愛女阻做KOL

聽到羅敏莊的全盤大計，移民似乎是事在必行，她說暫定是5年後進行。「我老公50㗎啦，雖然未夠期退休，但都要plan定，之前去過當地學校睇，校舍有湖、6個網球場，大到不得了，小朋友有個開心童年影響一世，雖然因國際學校關係，學費同香港差不多，但起碼少了一筆入場費，加上全部都係英籍老師，我覺得成件事都可行。」香港部分國際學校推出提名權、債券等，供家長以私人或公司名義購買，持有人可獲優先面試的資格，入場費由20萬到500萬……難怪羅敏莊早前在專頁提出泰國學府優勢後，得到唔少家長踴躍查詢，令這位KOL更有信心擴大業務。「其實好多香港人都已經玩得好精，所以我唔會介紹去邊玩，但睇樓、學校同醫學美容係好有發展空間，你睇佢哋變性手術咁勁就知啦。」全盤大計在手，打算每月一泰遊的羅敏莊卻因囡囡一句「媽媽我好掛住你，你以後唔好走。」而受到影響，令她唔知好嬲定好笑。不過，羅敏莊接下來將接拍攝ViuTV新劇，既要做KOL、又要做好媽媽、好演員，時間分配看來是一大考驗。

服裝：Benita Fashion

場地：The AIR(The ONE)