港女要男友綁鞋帶係公主病？　暖男張振朗都試過：女仔可能唔舒服

不少廿四孝男友，聲稱會為女友赴湯蹈火，在所不辭，但若然要他們在大街大巷，眾目睽睽之下，為女友跪低綁鞋帶，卻不是人人做得到。不要以為這是一個簡單動作，舉手之勞，但對一班「唔怕痛，只怕冇面」的男士，卻要經歷心理掙扎，所以為女仔綁鞋帶的行徑，更被移植到韓劇之中，《太陽的後裔》宋仲基就曾經幫宋慧喬綁鞋帶，而另一齣韓劇《焦急的羅曼史》，亦有成勛跪在地上幫宋枝恩綁鞋帶的情節，俘虜女生萬試萬靈。

近日一張男生為女友綁鞋帶的相片在網上瘋傳，背景是理工大學，網民評語男女大不同，女生覺得這個男仔「好有風度，夠細心」、「有乜問題，幫男友綁都試過」，但男網民就紛紛恥笑該名男生，「個女仔隻手係咪廢咗」、「港女同兵」、「女友邊捨得叫個男友通街咁做」，原來女生覺得浪漫的行徑，對男人世界來說，卻是甚為羞家。

在剛播畢的《踩過界》中，張振朗飾演的GoGo谷一夏，雖然口花花，但對於李佳芯飾演的Never，卻是深情一片，被網民大讚是暖男，最後Never疑似死過翻生的結局，更令不少劇迷戥他們高興，希望二人能再續前緣。現實生活中，張振朗原來一樣好錫女友(陳芷尤)，他接受《香港01》訪問，「綁鞋帶都好正常啫，諗深一層可能個女仔拎住好多嘢，或者嗰幾日唔舒服，今日幫女友綁鞋帶，他朝一日女友會幫返男仔綁皮帶呢，好難講嘅，得出結論係最緊要雙方舒服囉。」

「我都有試過幫女友綁鞋帶，所以我覺得成件事好正常嘅。(呢件係你為女友做得最窩心嘅事？)咁又唔係，試過約女友去到一個地方，但唔俾佢入去住，到我準備完，當佢入到去見到地下點住好多蠟燭，圍咗一個好大嘅心形，當時佢嘅反應係好開心嘅。」

至於女神簡淑兒知悉男生當街為女友綁鞋帶後，她亦回憶起自己的舊戀情，「我記得都試過，好耐之前拍拖嘅時候，好記得我著住條短裙，行行下甩鞋帶，好記得當時嘅男朋友，同我講「妳甩鞋帶呀」，講完呢句就跪低幫我綁鞋帶喇，嗰下我係覺得好窩心嘅，我諗佢係見我著住短裙，一蹲低就走光架嘛，呢個係個好窩心嘅角度去做呢件事囉。(妳支持男生幫女仔綁鞋帶？)好睇嗰對男女嘅相處方式，同拎手袋一樣，有啲人接受到，有啲人接受唔到，我自己就唔太鍾意人拎手袋嘅，至於綁鞋帶其實好睇當時情況，雖然唔覺得係好羞家或者好敗德嘅事，但如果個女仔提出就唔係咁好。」雖然男兒膝下有黃金，但能夠俘虜到女神，跪低綁鞋帶又有乜所謂。