王祖藍去年與邵氏兄弟電影公司合資「手工藝創作」公司，旗下藝人超過廿名。一心諗住有錢齊齊搵，有祖藍北上更容易，結果這段時間，似乎只看到王祖藍一人在跑，旗下藝人的工作量且至曝光率是否不如理想？祖藍輕嘆了一聲：「暫時做得唔係咁好，好多問題係當初預想唔到。」

去年祖藍公司成立時，他曾說過力不到不為財，但很多東西往往事與願違，情況如同《老表》。「大家見到我就以為可以搵人仔，但其實並唔係咁簡單。第一是政策上，香港演員依然是境外，所以如果在一個製作上，已經有幾個大演員，我哋就未必有空間；第二是語言問題；第三就是小鮮肉競爭非常大，要插入去真係唔易。同埋我自己做開係一線電視台、或網絡平台的綜藝節目，但當我的藝人想拍劇時，我缺少了那一部分的聯絡，所以唔係咁易推。」

沒有任何的藉口，錯了就是錯，為了解決這問題，祖藍最近招攬了一個新團隊，用作推公司的二、三線藝人到內地。當然，他也會要求藝人先裝備好自己，皆因內地人才多的是，台上台下秒秒都在過招。「如果真係要上去發展，係要對自己的能力好清楚，我上去時都唔肯定我係得，去到內地自己好似百子櫃咁，要你唱就唱，要你演就演，所以唔係個個一去到就可以。」祖藍說公司香港部分，已暫停簽藝人，反而內地部分，他簽了幾個小鮮肉，因為市場大量需求。提到金剛離開無綫後，也被收歸旗下，祖藍說金剛在綜藝的發展空間好大，加上沒有語言上的問題，所以才跟他合作。

看到祖藍為公司、為作品如此奔波又內疚，細細粒認為老闆此舉是謙虛。「佢其實帶咗好多機會給我，而那些機會是我自己未必可以爭取到。」細細粒咁講又何況唔係謙虛？不過，看看她今年與阮兆祥組隊主持內地綜藝《喜劇之王》，加上不少登台的機會，又好似真係講得幾有道理。相比大台「兩點入廠練一練，八點開機拍」的綜藝節目，細細粒說為了《喜》的比賽環節，花了兩個多月時間去排練，而且一定要練到「到位」，跟香港完全是兩回事。

出道已不時與祖藍合作，去年又成為旗下藝人，細細粒認為仍需要時間去磨合，儘管也有抱怨過，但亦深明不能一步登天。「唔係話你要紅就紅，而係都要努力又或者做好多準備，甚至睇你有冇天份，像老闆（祖藍）走到今天的位置，也是有很多付出。」細細粒笑言公司的自由度很高，有時甚至在出job前才醒起要跟公司報案，在旁的祖藍聽罷也不禁擺出老闆應有的態度：「都要早啲通知，呢啲係規矩。」

面對藝人的不安，祖藍說也只能盡量去安撫，但由於已不是新人，且有自己的堅持，也有不易跳出的comfort zone。他更笑言理念唔一致也絕對正常，在不能將自己一套放在別人身上時，唯有花點時間、花點功夫做說客，但偏偏這位老闆最缺乏的是時間……「要好客觀咁同佢哋分析，當你有什麼要求時你會失去什麼，當你願意犧牲時你會得到什麼。藝人好易無安全感，成功可以開心得好快，失敗亦會唔開心得好快，我一直都係唔會特別開心或唔開心，但呢啲係抵抗力問題，同埋，藝人係唔知自己處於飄飄然，因為藝人本身係一種被寵壞的生物，當慣了被服侍，唔會知道自己一舉一動影響好多人。」

說時，祖藍又再輕嘆一聲。「真係煩，個個傾唔掂就打比我，我都處理唔到咁多。」雖然口口聲聲話煩，但直到訪問完結後，祖藍依然提到想盡力幫助自己的藝人，然後又再跳入困住他一年多的內疚情緒之中。如果大家有機會見到祖藍，不妨跟他說聲加油。

攝影：黃國立髮型：Ted Yeung @ i i Alchemy hair & nail化妝：K.T. Tsui服裝：SON OF A KINGStyling：Dicky Lee