【使徒行者2】宣萱飲水都中招 炸彈落肚會上腦係膠定係高科技？
《使徒行者2》今個星期就進入結局篇，今晚將會播放第２６集，或者有網友會表示「我一集都冇睇過去」，不要緊，這一集一定要睇，橋段真是要天才先寫到，劇情講「御用人質」宣萱Scarlett準備到外國展開新生活，但竟然臨走前被魏德信(Victor)截停了，並告知Scarlett腦裏被植入了微型引爆裝置，一走就會爆仲會即刻死！嘩！呢條橋好勁喎！
植入炸彈入腦喎，好高科技喎，點植入呢？原來宣萱飲了Johnny秘書阿敏安排的一杯水，原來嗰杯水就係微型引爆裝置！嘩！嗰微型裝置細到睇唔到，飲落肚又會上埋腦，真係好高級嘅生物科技呀！雖然你都可以反駁話宣萱飲完杯水之後，下一秒被人抬人手術室被植入炸彈嘅，但暫時劇情就未有交代，編劇可能都會覺得呢嗰情節太娘所以就先特寫杯水。
有時都真係替一班演員辛苦，劇本咁「膠」但要好認真去做，真係好考功夫，之後亦奇怪，Victor（陳豪飾）相當擔心Scarlett的病情，無端端找了一位朋友分析Scarlett的x光片，「呢度有嗰陰影係腦動脈附近，係外來裝置，探測到電極同能量，裝置就好似腦動脈瘤上，爆係會死人。」重點來了，原來呢位朋友只是一名機械工程師，但呢嗰工程師連x光片都識睇，真係好勁！完全唔明點解事情變到咁嚴重，Victor仲要搵一位機械工程師而唔係搵醫生來診證呢？又或者係呢幕可以加多一位醫生在旁邊，一齊分析咁都仲可以順理成章啲，btw真係百思不得其解..
有不少網友都覺得Scarlett腦裏被植入了微型引爆裝置十分搞笑，並嘗試運用邏輯去分析，「炸彈裝置不需要電源嗎，就算充電式的能支撐多久？」、「十年二十年過後按遙控還會爆炸？」我覺得要呢嗰時刻真係要搵化學教授問下先得喇，但最終原來係淨係用邏輯推理係唔得，實在太多黑人問號喇！幾時飲水會飲到去個腦而唔係去個胃，真係好詭異！不過邊個叫你咁認真睇TVB劇呢？你當咗佢係美劇看待，係你嘅問題囉！
不過都要讚一下無綫，微型引爆裝置植入腦呢條橋，原來2008年有一套由John Lyde執導的電影《the eleventh hour》，已經玩過，劇情講述前美國海軍特種部隊成員Michael，在一次拯救行動中在北韓被俘虜，3年後獲釋回國，可惜其妻子竟被人在腦裏植入微型炸彈，威脅其妻子暗殺一名美國參議員，否則炸彈就會自動引爆！唔知今次《使徒行者2》係咪睇完呢套電影之後，覺得太有創意所以加入劇中呢？