香港人多車多，周街都係人，由踏出家門一刻已經遇到好多好多陌生人，大家應該成日遇到一啲乞人憎舉動。由森美小儀主持嘅商台節目《早霸王》呢日舉行一個「十大討厭都市人」選舉，喺Facebook Page列舉15項俾網友投選，而幾位主持亦有分享個人經歷，你有遇過幾多個？

第十位：背包/長髮打到人又唔知

唔少女士無束起長髮，轉身一刻好似好夢幻，不過喺你身後嗰位就中晒招，特別係冬天真係好似俾刀刮面一樣，小儀都話：「我都試過俾人地嘅頭髮刮到眼，嗰下真係好痛，同埋覺得人地個頭好似好污糟」

第九位：個袋霸埋你個位

平時出街食飯，餐廳逼其實都預咗，未有人坐低放住袋先本身不為過，但有人嚟都唔讓就好似霸道咗小小啦，小儀都遇過好多次：「去茶餐廳卡位，有一位單身男士放背囊喺一個位，我地三個女仔被安排坐同一張檯，佢都唔會拎起個袋放大脾，只會拉近少少但點都要佔位置，大家一齊逼。」

第八位：食飯除鞋捽腳趾

網上不時有人上載，搭車除鞋放腳到對面椅上，大罵無公德心，以為咁樣已經好黑人憎？西瓜就分享真係有人食飯除鞋捽腳趾：「上年喺茶樓仲有見到，佢好似好舒服咁，真係好想踢走佢對鞋。」

第七位：對服務嘅人態度囂張

囂張嚟講有時都幾主觀，森美就提供解決方法，等大家唔會不小心被誤會：「有啲人好容易被觸怒，然後就覺得人地服務態度唔好。可以試下每次都講兩次唔該同多謝，人地就唔會覺得囂張。」

第六位：病但唔戴口罩

自從SARS之後，香港人開始習慣唔舒服就要戴口罩，不過森美就話呢個概念其實係錯架﹗「病戴口罩係無用嘅，唔病嗰啲戴先有用，因為空氣細菌唔多，手上先至多，如果病就唔好掂完自己嘅鼻涕口水再去開門，就會轉移到手把上，更容易傳染。所以身邊人病自己應該即刻戴口罩自保。」

第五位：講電話大大聲

返放工難得有位坐想瞓一陣時，忽然遇到有人講電話講到全車都聽到其實真係好燥，但係森美話：「其實有咩問題呢？日本傳過嚟嘅文化，連講嘢打keyboard都要靜音，但點解一定要滅聲先？搭車又唔係去圖書館又唔係要靜坐，講電話大聲極有限啫。」

第四位：隨地吐痰

喺香港隨地吐痰係犯法架﹗定額罰款$1500真係廣告都不停話你知，但總係有人改唔到呢啲壞習慣，森美曾經多次中招，唔止腳，連面都試過﹗邊個吐痰吐到咁出位呀﹗

第三位：食煙噴到/辣到人

香港所有室內地方都被訂為法定禁煙區，邊行邊食雖然唔係犯法，但係行喺後面嘅人迎面索晒啲二手煙，成頭成身都臭晒，如果仲要拎住煙頭手FING FING，辣到人就真係可怒也﹗

第二位：咳同打乞痴都唔掩口

其實同第六位好類近，戴口罩當然隔得到絕大部分細菌，但唔戴口罩，咳同打乞痴都唔應該對住空氣大鳴大放啦，真係想周圍嘅人陪你一齊病咩。

第一位：打尖

能夠打低一眾強橫對手，打尖成功成為是次「十大討厭都市人」選舉Number one，真係實至名歸。無論食飯、買演唱會飛、抑或等巴士，大家都總有被打尖嘅經驗。一般人會同對方理論，森美就提供一個更好嘅方法：「唔好叫佢排隊，應該問：「先生你係咪打尖呀？佢話係咪俾佢打囉，如果佢話唔係咪話「哦﹗差啲誤會咗你想打尖添，如果想排隊麻煩後面啦。」咁講係咪無咁串呢﹗」