【溏心風暴3】三大老薑橫掃視后提名名單　岑麗香有份陪跑

無綫的年度超級盛事《萬千星輝頒獎禮》提名名單經已出爐，目前播出了不夠10集的50周年台慶重頭劇《溏心風暴3》一如所料獲得多項提名，但最估唔到的是竟然一劇有成4個女主角提名，包括三大老薑：李司棋、米雪、關菊英，以及戲齡尚淺的岑麗香，未橫掃頒獎禮獎項，就已經橫掃了提名名單。而觀乎這個陣容，相信今屆視后好大機會都是這三大老薑之爭，香香點睇都似係陪跑。

無綫節目及製作副總經理杜之克接受香港01記者訪問時已表示，以往多會於年尾12月舉行的頒獎禮，今年是刻意推遲到明年1月底舉行的：「因為而家有兩套台慶劇《誇世代》同《溏心風暴3》都係長劇，成4、50集，為了公平起見所以等到劇播完先搞頒獎禮。」睇得出大台有幾重視呢兩套劇，不惜將頒獎禮延期，而《溏心3》又獲得咁多提名，看來到時都會穩奪多個大獎，至於其他獲提名視后的候選人，例如《迷》的田蕊妮以及《親親我好媽》的江美儀，大家可以已經唔記得喇，除非突然有人瘋狂吹湊其他候選人，否則都好難同《溏心3》的三大老薑鬥過。