【萬千星輝】何遠東感激田蕊妮拉票　如親細佬照顧：睇返都眼濕濕

昨日無綫舉行頒獎禮提名名單記者會兼員工頒菜宴，這些原本一啖笑的活動，發生了動人的一幕，視后田蕊妮不論在台上或台下都為《降魔的》龍貓（何遠東飾）拉票，更為他說到哽咽、流淚，（【TVB頒獎禮】田蕊妮喊住撐何遠東　讚龍貓好努力：真係好想佢攞）一向硬淨的阿田竟然講到喊，而這個男人竟然不是老公杜汶澤，而是她視為親弟的何遠東。

事隔一晚，何遠東接受《香港０１》訪問，依然非常感動，他說：「佢喺台上嗰陣，我已經控制唔到，就算翻睇返都眼濕濕，但當我見到佢ig再寫『弟，姐支持你！』，見到呢幾隻字，我就再忍唔住.....講真，娛樂圈冇人需要特別顧我，或者要對我好，我係邊個啫？做乜對我咁好？但佢（阿田）係我有需要嘅時候就會走出嚟。」

肥東和阿田情同姊弟，緣份始於2012年拍攝《巨輪》時，劇中他飾演田蕊妮弟弟，但原來初時肥東是很怕阿田,他說：「阿田喎，嗰樣好有霸氣，第一次同佢有對手戲，我驚到縮埋一舊，拍完放飯，行出廠阿田就即刻同我講『喂，細佬你做乜咁驚呀？你咁樣做戲唔得㗎喎！』嘩！佢咁講完，我仲驚，跟住就上canteen食飯，成程飯都唔係好敢望佢，最後我入廠前同佢講，『其實我好驚妳，我唔知點解....見到妳就好驚呀！』我諗唔到佢跟住喺到大笑，之後佢話『有咩好驚呀？儍豬嚟㗎！」就係呢下喇，我哋就好似冇咗隔膜。」

做朋友亦講緣份，有些藝員就算合作多次都只是同事，但何遠東和田蕊妮就情如姊弟，他說：「我都唔知點解，我估前世我哋有啲嘢嘅，哈哈，雖然我地一睇就知冇嘢，但我忍唔住叫佢做家姐，佢好到管接管送，我拍７成嘅劇都係有佢份，拍《鬼同你OT》我哋去數碼港，佢由大埔車我去，收廠幾夜佢都車埋我。」雖然在無綫的位置有分別，不過肥東和阿田關係由如親人，而肥東最難忘是和「家姐」的一次對話.....

「我記得嗰次係拍《鬼同你ot》，嗰陣自己諗多咗，成日驚唔夠人好，就做得over咗，佢忍唔住同我講，佢應該觀察咗我兩三日㗎喇，佢就等有次大家都唔駛埋位就同我講，佢唔係鬧嘅，佢大約話『你做乜咁嘅？你做咁多？諗住搶戲？唔好呀，做好自己得㗎喇，唔好唔信自己。』聽完我成個醒咗，之後自己都調節返正常。」

有視后為肥東拉票，亦引起不少網民想投票給肥東，但他深知獲獎機會不大，他說：「我就冇諗喇，有提名已經係一個好大嘅破格同鼓勵，坦白講，我覺得同攞咗冇分別，甚至比攞咗更加高興，因為不論尋日喺廠宣佈提名名單嘅時候，所有同事對我嘅歡呼聲，幕後嘅同事為我打氣，原來喺呢間公司我儲咗好多積分，大家都明頒獎禮有好多因素，我已經贏咗喇，至於個實體，我已經尋日同佢影咗相㗎喇....」希望〈最佳男配角》真係全民投票，等肥東可以攞走個獎。