噚晚903嘅頒獎典禮真係好精彩，鋒頭已經蓋過晒其他台嘅頒獎禮。不過，喺度喚起大家對TVB勁歌總選（《勁歌金曲頒獎典禮》）嘅回憶先！星夢成為大贏家一啲都唔意外，咁就唔使再講。仲記得嗰日最有睇頭嘅表演，就係搵咗TVB五位小花：黃心穎、蔡思貝、馮盈盈、張寶兒同埋邵珮詩扮韓國女團，著晒打歌服咁跳胡鴻鈞嘅《到此一遊》，好似好有新鮮感咁…但係女團都救唔到勁歌總選嘅收視呀！

TVB勁歌總選收視一年比一年低。對比過去兩年，2015年同2016年分別係16點同15.2點，都已經係危危乎，今年貼近10點嘅邊緣，跌咗差不多3點咁多，只得12.8點，真係好令人震驚…其實TVB勁歌總選嘅代表性慢慢削弱，今年情況特別嚴重，說實在呢個係一個劇集主題曲嘅頒獎典禮，上到台拎獎嘅人，一式一樣地多謝星夢老闆何哲圖。加上發生過四大唱片公司嘅版權風波之後，部份歌手都不會出席TVB嘅頒獎禮，吸引力自然大減。